A l'entschatta da quest favrer è vegnida lantschada la terza ediziun da la campagna da Gastro Grischun. I sa tracta d’ina acziun da stgars 300 hotels e restaurants en Grischun. Durant otg emnas han els flyers, cartinas, placats ed auter, nua ch'i stat scrit si il slogan «Hesch z ' züg zum...». Sper quel è er si in QR-Code che maina sin ina pagina d'internet cun infos davart plazzas, jobs e la branscha. Ma ins po er far in quiz per chattar ora tge professiun en la gastronomia ch'ins pudess far. Er sin la pagina d’internet chattins in video ch'è vegnì filmà il rom da la campagna l’atun passà.
Gia cun las ediziuns avant han ins pruvà dad animar surtut glieud giuvna da far in giarsunadi en ina professiun da la gastronomia. Quai cun agid da plirs curts videos, sut il num «Gastrostorys», per dar invistas davos las culissas da la gastronomia. Mussar la vart positiva da la branscha era la finamira. Da quella vegn tenor Marc Tischhauser, il mainagestiun da Gastro Grischun, rapportà massa pauc. Co ch'el raquinta han ils videos funcziunà. El di che dal onn 2024 ha quai dà in augment da 20% tar ils contracts d’emprendissadis en la gastronomia.
Intgantar glieud giuvna per la lavur en la gastronomia. Ma be cun ina campagna n'è quai betg fatg. Igl è er da lavurar vi da la qualitad da las scolaziuns. Era quai vegn fatg, manegia Marc Tischhauser.
Ma be dapli giarsuns na schlian betg il problem. I dovra er autra glieud che returna u vegn nov en la branscha. Quai dess la terza ediziun da la campagna sustegnair spezialmain.