Il preventiv quinta cun investiziuns bruttas da bunamain 427 milliuns francs. Investì vegn cunzunt er cun construir dapli vias er en regiuns perifericas. Uschia ch'ins po er vesair nua ch'ils daners budgetai van.
La situaziun finanziala dal chantun saja solida, ha communitgà il Departament da finanzas e vischnancas. Sut il stritg pon ins constatar ch'il preventiv per l'onn 2020 sumeglia fitg a quel dal 2019, là vegniva quintà cun in deficit da 33,7 milliuns francs. Sch'ins guardia exact pon ins tenor Christian Rathgeb, il minister da finanzas dentant vesair ch'il chantun dat or dapli daners, cunzunt cun contribuziuns a terzs. Quai vegnia lura cumpensà cun dapli daners che vegnan da la Confederaziun.
Mal il venter fan dentant vinavant ils custs da sanadad. Il chantun sto er quest onn puspè dar or dapli daners per sustegnair persunas che na vegnan betg da pajar las premias da las cassas da malsauns. Quai valitescha il minister da finanzas sco problematic. Qua stoppia dentant cunzunt la confederaziun prender mesiras per sbassar ils custs. Quai vegnia gia uss discutà en il parlament federal, uschia Christian Rathgeb vinavant.
Perspectivas a partir 2021
A partir dal 2021 s'augmentian las expensas però cuntinuadamain – tranter 65,1 milliuns l'onn 2021 ed 89,4 milliuns l'onn 2023 – pli fitg che las entradas. Per tuttina pudair garantir vinavant finanzas equilibradas vegnian examinadas las incumbensas e las prestaziuns, ha ditg il minister da finanzas Christian Rathgeb. Co precis quai vegn fatg vegnia anc decis quest onn e lura er communitgà.
Il Cussegl grond vegn a tractar il preventiv en la sessiun da december.
RR novitads 10:00