Dapi curt datti in nov rapport ch'è s'occupà da dumondas geologicas e co il privel era vegnì giuditgà avant che la bova dals 23 d'avust 2017 è vegnida a val a Bondo. Fatg il rapport ha il geolog independent Thierry Oppikofer per la Procura publica dal chantun Grischun. Oppikofer è in spezialist per bovas da crappa. Il magazin Beobachter ha survegnì il rapport da confamigliars e scriva che quel vegnia a la conclusiun ch'i devia divers indizis per ina crudada da crappa gia avant la bova. Las autoritads avessan stuì serrar las sendas en Val Bondasca.
Autra conclusiun ch'il rapport oriund
Uschia cuntradi quest nov rapport a la valitaziun oriunda da la Procura publica dal Grischun. Lezza aveva mess ad acta dus onns suenter la bova il cas cun la conclusiun ch'ils schabetgs n'eran betg stads previsibels. I n'haja betg dà indizis per la crudada da crappa e bova. Sa basada era la Procura publica lura sin in rapport da l'Uffizi da guaud e privels da la natira dal chantun Grischun. Pia expertas ed experts ch'avevan era recumandà mez avust a la vischnanca da Bregaglia da laschar avert las sendas en Val Bondasca. Vul dir: la Procura publica era sa basada sin in rapport fatg da persunas che pudessan esser cumpigliadas.
Confamigliaras e confamigliars da las persunas ch'èn mortas en la Val Bondasca eran sa dustadas cunter la decisiun da metter ad acta il cas ed avevan pretendì in rapport independent. L'emprima instanza, numnadamain la Dretgira chantunala dal Grischun, n'ha betg laschà valair quai. La segunda instanza però, la Dretgira federala, ha partì ils dubis dals confamigliars. Perquai è il cas puspè enavos tar la Procura publica dal Grischun.
Balla è tar la procura publica
Uss sto la Procura publica dal Grischun decider da nov sch'ella fa in'accusaziun pervia da mazzament per negligientscha. Sin basa da las infurmaziuns ch'èn avant maun han las autoritads da giustia da giuditgar sche l'obligaziun da diligenza è vegnida negligida. Uschia pudess il cas tuttina anc vegnir davant dretgira e quai passa sis onns suenter la crudada al Piz Cengalo.