A Cuira datti gia sis differents spazis da coworking. En las vals dal Grischun vegnan quels ussa era chattads. En l'entir chantun pon ins chattar passa 20 differents spazis da coworking. Il grond boom han ils spazis da coworking survegnì curt suenter la pandemia da corona. Il trend aveva dentant cumenzà gia avant la pandemia. Tenor SRF datti l'onn 2022 radund 450 coworking-spaces dapli che l'onn 2016.
La raschun principala per lavurar en in coworking-space è ch'ins po spargnar la via en biro che dovra bler temp. Enstagl da chaminar la damaun en biro e turnar la saira, ston ins mo chaminar tar il proxim coworking-space, il qual è en ils blers cas pli manaivel. Ins pudess era lavurar davent da chasa. Ma las circumstanzas n'èn betg optimalas là. L'infrastructura mancanta u las distracziuns en il homeoffice motivescha blera glieud da lavurar en in coworking-space.
Muntada d'in coworking-space per il turissem
Tenor in studi da la Scola auta spezialisada dal Grischun han coworking-spaces in grond potenzial en las regiuns turisticas. Lena Pescia, la co-directura da studi da l'institut per turissem e temp liber, di ch'ils uschenumnads «light workations» possian prolungar considerablamain il temp da dimora dals giasts. Workation è ina leva maschaida da «work» (lavur) e «vacation» (vacanzas). Quai permetta als giasts da lavurar tuttina vi da tscherts projects ch'els na pon betg laschar d'ina vart durant las vacanzas.
Quai che manca anc il mument è ina plattafurma surordinada per coworking-spaces – cumparegliabel a booking.com per chombras d'hotel. L'utilisadra u l'utilisader vuless ina plattafurma survesaivla, nua ch'ins po reservar directamain.
Ils blers coworking-spaces han in'atgna pagina d'internet, nua ch'ins po chattar las datas da contact per la registraziun u directamain il sistem da reservaziun. Per il giast che tschertga in coworking-space en ina regiun da vacanzas è quai cumplitgà, cunquai ch'el sto cumparegliar sin differentas paginas d'internet, tge purschida che correspunda il meglier a ses basegns.
Exempel per coworking-spaces en regiuns turisticas
-
Bild 1 von 4. Coworking-space Scuol. Mountain Hub Scuol. Bildquelle: Mess a disposiziun.
-
Bild 2 von 4. Coworking-space Silvaplana. Freestyle Workplace. Bildquelle: Mess a disposiziun.
-
Bild 3 von 4. Coworking-space Glion. Coworking 7130. Bildquelle: Mess a disposiziun.
-
Bild 4 von 4. Coworking-space Sedrun. Coworking Service Sedrun. Bildquelle: Mess a disposiziun.
Il coworking-space a Sedrun sto serrar
Dapi la reavertura avant 2 onns è il local vegnì duvrà mo pauc. La vischnanca da Tujetsch vul en l'avegnir betg pli cuvrir ils custs, ha il president communal Martin Cavegn ditg ad RTR.
Suenter ina investiziun al cumenzament e la cuvrida annuala da la perdita da circa 5'000 francs da la vischnanca, n'essan nus betg pli pronts da sustegnair vinavant l'uniun.
Sco quai ch'il president communal di vinavant, na renda l'offerta d'enfin uss betg. La vischnanca haja remartgà che la gruppa en mira è vegnida valitada fallà. Giasts da hotels u possessurs d'abitaziuns da vacanzas lavurian pli gugent or da las atgnas localitads che en in coworking-space.
Natiralmain saja quai cundiziunà stagiunal, perquai ch'els sajan cunzunt dependents da turists. Ils custs da radund 5'000 francs per onn che la vischnanca ha stuì cuvrir na sajan nagut en cumparegliaziun cun autras expensas per il turissem.
Jau chat donn. In coworking-space tutga tar in vitg da vacanzas modern sco in bogn u ina patinera.
Best practice en il Grischun
Spazis da coworking ch'èn bain frequentads datti en l'entir chantun. Il local da l'uniun coworking 7130 ed il hub da Mia Engadina a Scuol èn buns exempels per quai. Differenta glieud sa raduna per lavurar. Ina maschaida d'indigens e turists che vegnan bain a frida in cun l'auter. Ils turists èn però da chattar per il pli be durant la stagiun auta.
Ils coworking-spaces da Mia Engadina
-
Bild 1 von 3. Il coworking-space a Scuol. Bildquelle: Mess a disposiziun.
-
Bild 2 von 3. Il coworking-space a La Punt. Bildquelle: Mess a disposiziun.
-
Bild 3 von 3. Il coworking-space ad Ardez. Bildquelle: Mess a disposiziun.
Mia Engiadina maina trais differents spazis da coworking. In a Scuol, in a La Punt ed in ad Ardez. Els dattan gronda paisa a team-retreats, a workations ed al svilup da l'Engiadina. Durant tut l'onn lavuran blers indigens en las localitads. Ils spazis da coworking vegnan dentant occupads il meglier durant las vacanzas da scola, perquai ch'ils turists fan alura era diever da la purschida. Ins chatta dentant adina ina plazza da lavur libra. Il project «InnHub La Punt» è creschì or d'ina idea da Mia Engiadina.
Il coworking-space a Glion
A Glion na serva il local da coworking dentant betg mo a la lavur da mintgadi. Ils coworkants stabileschan relaziuns in cun l'auter e daventan ina uschenumnada «coworking-community». Quest contact tranter la glieud da là mancass a las collavuraturas ed als collavuraturs en il homeoffice. Sin plaun professiunal pon ultra da quai vegnir barattads temas per vesair l'agen project or d'ina perspectiva dal tuttafatg differenta.
Ina da las finamiras è da crear ina coworking-community che sa barattan, gidan e lavuran gugent ina cun l'autra.
Il spazi da coworking datti dapi l'avrigl 2023, pia stgars dus onns. L'edifizi, nua che l'uniun coworking 7130 è sa drizzada en, è avant vegnì sanà per garantir in bel ambient. La maschaida da las mobiglias nairas, dals palantschieus alvs e da las paraids da lain porscha in'atmosfera agreabla e d'auta qualitad.
Impressiuns dil coworking-space a Glion
-
Bild 1 von 7. L'entrada dal coworking-space a Glion. A l'entschatta da la citad veglia da Glion, sper la chasa communala sa chatta il coworking-space da Glion. Sin la stgala davant l'entrada vegnan ins beneventà da trais figuras da lain che sesan. Bildquelle: Mess a disposiziun.
-
Bild 2 von 7. Il spazi da coworking a Glion consista da differents locals. Persunas che vulan lavurar qua pon tscherner ina plazza da lavur. Bildquelle: Mess a disposiziun.
-
Bild 3 von 7. Il local da coworking porscha differents locals. Bildquelle: Mess a disposiziun.
-
Bild 4 von 7. Il local da coworking porscha differents locals. Bildquelle: Mess a disposiziun.
-
Bild 5 von 7. Il local da coworking porscha differents locals. Bildquelle: Mess a disposiziun.
-
Bild 6 von 7. La stanza da sesida. Ultra da differentas localitads cun differentas plazzas da lavur porscha il coworking local ina stanza da sesidas. Quella po er vegnir reservada da las clientas e dals clients. Ultra da quai stat la stanza da sesida la saira a disposiziun ad uniuns che pon reservar quella cun agid d'in abunament spezial per in pretsch favuraivel. Bildquelle: Mess a disposiziun.
-
Bild 7 von 7. La terrassa. A pausas cuminaivlas da mezdi envida la terrassa. Las persunas che lavuran en il spazi da coworking pon mangiar e passentar qua ensemen temp. Ultra da quai po la terrassa vegnir reservada per occurrenzas separadas. Bildquelle: Mess a disposiziun.
Per che l'uniun coworking 7130 survivia ils emprims onns, ha la vischnanca concedì ina garanzia da deficit. Sch'ils custs surpassan pia las entradas dal consorzi, vegn la differenza gulivada tras ils meds finanzials da la vischnanca. Fin ussa era quai adina il cas. Quest onn speculescha il president da l'uniun coworking 7130, Gian-Marco Bianchi dentant sin ina nulla naira.
L'emprim ed il segund onn da gestiun n'avain nus gì nagina nulla naira. Ussa, il terz onn, vesa quai ora meglier e nus vegnin probabel a serrar giu cun ina bilantscha positiva.
L'uniun che maina il coworking-space a Glion organisescha dentant er occurrenzas per autra glieud. Saja quai sairas da gieus per famiglias, metter a disposiziun la stanza da sesidas la saira per uniuns u far in viva sin la fin d'emna tar l'uschenumnà «bier um vier».
Cun talas acziuns emprov'ins da promover la vita en la citad pitschna. Quests eveniments che na rendan natiralmain betg portan dentant puncts da contact cun clients potenzials e porschan a la glieud che fa gia diever da la purschida ulteriuras pussaivladads da crear ina rait da contacts.