Ils davos 100 onns è il carstgaun gia stà sin la glina ed ha sviluppà autos che charreschan a moda autonoma. Portasains n'èn en quel tschientaner dentant betg sa sviluppads vinavant a moda remartgabla. Il sistem per mesirar la grondezza dal BH è gia var 100 onns vegl e sa basa sin mo duas indicaziuns. Quellas pon en consequenza mo resguardar pauc las individualitads dal corp feminin. Quai vul dir: Ils BHs vegnan ozendi producids tenor mesiras da standard – e persunas che portan in BH ston sa sfurzar en in pèr paucas grondezzas.
Linda Durisch, inschignera textila, e ses um Mathias Durisch, designer industrial ed oriund da Domat, sviluppeschan ensemen gia plirs onns products per lur clientella – fitg savens èn quai products textils. E grazia a quella lavur sajan els fruntads in di sin l'idea per lur agen product innovativ: in BH sin mesira che vegn dentant producì industrialmain.
Il bh sin mesira cun silicon enstagl da fier
Il process funcziuna sco suonda: a maun d'ina app inditgescha la dunna differentas datas e fa suenter in bodyscan da sasezza. L'intelligenza artifiziala davos quella app cumbinescha las infurmaziuns lura cun ina banca da datas cun mesiras da 1700 dunnas e po uschia calcular las mesiras individualas cun ina precisiun dad in centimeter. Quellas mesiras dovra lura ina maschina CNC che stampa ina lingia da silicon sin la taila dal BH. Sinaquai vegnan smatgadas las dretgas cuppettas en la taila e suenter ch'in laser ha taglià or il BH e quel pront. Quella lingia da silicon saja la gronda innovaziun da quel BH, declera Linda Durisch. Quella remplazza ils fierins classics d'in BH e sustegna la furma dal sain a moda individuala – grazia a las mesiras inditgadas da la clienta.
Il crutsch vi da quest process: il bodyscan duai la dunna far senza t-shirt – ma cun BH. Che dunnas èn probablamain scepticas envers il process da chargiar videos da sasezzas en BH sin in'app saja cler a Mathias e Linda Durisch. Els quieteschan dentant e din che la fatscha da la dunna vegnia da bell'entschatta zuppada. En pli na vegnian las datas da la dunna mai colliadas cun ils maletgs dad ella.
Anc dapli variaziuns en la pipeline
Dunnas ch'èn prontas da far in bodyscan da sasezzas survegnan persuenter in BH sin mesira, producì mo per ellas e fatg da material reciclà. Quel vegn fatg da rests da vegls tarpuns u da raits da pestgar. Tut quai custa natiralmain dapli ch'in BH da standard. Els dus èn dentant da l'avis ch'ils 130 francs che lur BHs custan sajan giustifitgads. E sche quel emprim product dad els persvada la clientella, hajan els anc ina massa autras ideas sco per exempel in BH per sains asimmetrics u bikinis sin mesira.
