Il nov concept da la Baselgia evangelica refurmada duai porscher ina rait da segirtad en cas che cunfins vegnan surpassads, saja quai en furma da mobing, mulesta sexuala u discriminaziun. Il concept ch'è vegnì lantschà venderdi sa drizza a glieud involvida cun la Baselgia: persunas emploiadas, voluntaris e voluntarias e glieud che fa diever da sias purschidas. Per il concept collavura la Baselgia cun il biro da cussegliaziun per il bainstar a la plazza da lavur MOVIS.
En conturns sco la Baselgia, nua ch'umans s'inscuntran, sa dattan relaziuns – però era ristgas che cunfins vegnan surpassads.
![Ina dunna en ina baselgia.](https://www.rtr.ch/static/cms/images/960w/98db77.jpg)
Erika Cahenzli, la presidenta dal cussegl-baselgia raquinta ch'els constateschian che la sensibilisaziun en la societad pertutgant la tematica saja creschida, quai che saja in motiv per la realisaziun dal concept. Il concept duai porscher mesiras per prevenziun ed intervenziun. In motiv per la creaziun da quel saja er il cas da renfatschas envers il president anteriur da la Baselgia evangelica refurmada svizra. En ina tala situaziun dovrian ins tschertas structuras sco agid.
Betg l'emprim concept
La Baselgia evangelica refurmada grischuna n'è betg l'emprima baselgia chantunala che ha lantschà in tal concept. Quai han gia autras baselgias evangelicas refurmadas fatg tenor las directivas da la Baselgia evangelica refurmada svizra. Era l'uvestgieu da Cuira aveva preschentà la davosa primavaira in codex da cumportament per evitar abus sexuals e spirituals. Il concept da la Baselgia evangelica refurmada na pretenda dentant nagina suttascripziun, sco quai è il cas tar il codex da la Baselgia catolica.
Realisaziun
Sis pass descrivan la realisaziun dal concept ch'è partì en duas parts: prevenziun ed intervenziun. Las scolaziuns che han davent dad uss lieu duas giadas l'onn, èn obligatoricas per persunas che sa chattan en l'emprim onn da lavur – per auters emploiads ed emploiadas èn ellas voluntarias. Gia quest schaner ha però lieu ina scolaziun per tut las persunas parochianas. La finamira da la prevenziun saja da promover ina tenuta che tolerescha nagin cumportament che surpassa cunfins. Erika Cahenzli accentuescha dentant ch'era ina toleranza da nulla na muntia betg ch'i na dettia nagins cas.
Per esser preparà per in tal cas dettia la segunda part dal concept – l'intervenziun. Per quest intent vegn purschì in telefon d'agid, nua che victimas e perditgas pon s'annunziar. Suenter in discurs al telefon vegnan ins lura eventualmain tramess vinavant a persunas internas cun las qualas ins po discurrer. Ultra da quai vegnan lura era purschidas instrucziuns co sa defender.
En cas che quai na tanscha betg vegnan tratgas mesiras pli severas – fin a persecuziuns penalas. Per il nov concept investescha la Baselgia 25'000 fin 30'000 francs.
![Ina tavla cun placats.](https://www.rtr.ch/static/cms/images/960w/70cca8.jpg)
Nus sperain che mo paucs telefons èn necessaris – essan però tuttina leds da mintga telefon che po gidar insatgi.
Il concept saja gia vegnì preschentà en plirs gremis. Las reacziuns sajan stadas positivas. La glieud saja leda d'avair uss structuras cleras e liantas.