En intginas regiuns en il Grischun haja ina mancanza da manischunzs e manischunzas d'auto da posta, sco la pledadra da medias, Katharina Merkle, di. Anc pon tut las plazzas vegnir occupadas, ma i saja adina pli difficil da chattar glieud.
Mancanza surtut a Laax e Lai
Tenor Katharina Merkle haja ina mancanza cunzunt en ils lieus Laax e Lai. Là saja il problem oravant tut la mancanza d' abitaziuns.
Là sentin nus ina clera mancanza. Nus pensain che quai ha da far cun la mancanza da la purschida d'abitaziuns. Las manischunzas ed ils manischunzs vulan numnadamain er abitar en quests lieus.
Ma i sajan er tschertgadas persunas en Surselva che lavuran a temp parzial e che surpiglian servetschs da bus da notg la fin d'emna.
Tuttas persunas sajan dumandadas
I na dettia betg blers manischunzs e bleras manischunzas qualifitgadas tenor Katharina Merkle. Perquai sajan tuttas persunas dumandadas: Glieud giuvna, glieud pli veglia ed era persunas che han lavurà avant en tut autras branschas sco per exempel en la branscha da coiffeur u en la gastronomia.
40% dal persunal d'AutoDaPosta ha varga 54 onns e vegn pensiunà ils proxims 10 onns. Perquai emprov'ins era spezialmain da mantegnair ils giuvens collavuraturs che han absolvì l'emprendissadi tar l'AutoDaPosta.