Il di il pli lung da l'onn è passà – ma la stad classica cun bler sulegl n'è betg anc arrivada en il Grischun. Il zercladur è stà pauc sulegliv e fitg bletsch, sco ils mais avant. Era Simon Esche, meteorolog tar SRF, descriva l'aura dal zercladur sco inconstant e cun bler plievgia.
Perquai ch'il sulegl mancava savens, parevi d'esser pli fraid che usità. Ma Simon Esche di ch'ils dis pauc suleglivs na muntavan betg dis pli fraids.
En blers lieus eran nus cun la temperatura precis en la media.
Quai che na saja dentant betg mo stà in sentiment, era la plievgia. Il meteorolog di ch'il zercladur saja stà bletsch tras e tras cun blera plievgia. Quai n'è però betg stà dapertut tuttina. A Cuira èsi stà plitost bletsch, entant ch'igl è stà pli sitg en l'Engiadina ed en la Surselva.
A Cuira sez hai dà 1,5 giadas dapli plievgia che in zercladur normal.
L'onn passà èsi stà pli sitg, pli chaud e pli sulegliv. Il cuntrast da quests dus onns è ferm, uschia ch'ins ha anc dapli il sentiment ch'i saja bler memia fraid quest onn.
![RTR](https://www.rtr.ch/static/cms/images/960w/2e8caa.jpg)
Era las proximas emnas na vesan betg ora meglier, di Simon Esche. La plievgia ed ils nivels vegnan a restar las proximas emnas. Tut en tut pon ins dir: per l'entschatta da la dretga stagiun da stad dovri anc pazienza.