37,6 grads celsius èsi stà il zercladur a Cuira. Mo 1981 èsi anc stà pli chaud en la chapitala grischuna. E l'entira stad tutga tar las trais pli chaudas, dapi ch'ins mesira la temperatura.
Bilantscha
Las variaziuns da questa stad en il Grischun cun dis da chalira, urizis ed uradis e blera plievgia sajan stadas extraordinarias. Sper temperaturas autas hai dà records da plievgia: ad Arosa 211 millimeters uschè blera plievgia en 72 uras sco anc mai ils ultims 123 onns. Sco explicaziun: In millimeter plievgia correspunda ad in liter aua da plievgia sin in meter quadrat. E per cumparegliar: Ina bognera tschiffa circa 180 liters aua.
Er a Cuira haja cun 144 millimeters plievgia en 72 uras dà in nov record. E cun 33,5 grads è quai stà il pli chaud di insumma dapi il cumenzament da la mesiraziun avant 64 onns. En la chapitala Grischuna haja dà durant l'entira stad radund 24 dis da chalira, pia cun temperaturas da 30 grads e dapli. Quai ha Jürg Zogg da SRF Meteo ditg en il schurnal regiunal da SRF.
Er il glindesdi ha l'aura en Svizra puspè procurà bunamain per records: Il cunfin da nulla grads è stà la notg passada tar 5’253 meters sur mar a Payerne en il chantun Vad e cun quai bunamain uschè aut sco tar il record mesirà la fin d’avust.
Grischun sto s'adattar
Tenor la Confederaziun è il Grischun gia sa stgaudà dapi il 1864 per 1,8 grads. I vegn spetgà in'ulteriura stgaudada da 2,9 grads, cumpareglià cun la perioda 1980-2010 sche las emissiuns muntan vinavant. Uschia u uschia stoppia il Grischun s'adattar vi da la stgaudada dal clima.
