La Ems Chemie cun sedia a Domat è vegnida bain tras l'emprima mesadad da l'onn 2022. En l'emprim quartal haja dà ina gronda dumonda per ils products da l'Ems Chemie, scriva l'interpresa en ina communicaziun. Il segund quartal saja stà pli pretensius. Entras la guerra en l'Ucraina sajan ils pretschs d'energia e per materias primas s'augmentads fermamain. L'interpresa haja perquai stuì auzar ils pretschs da vendita, haja dentant adina pudì furnir ses products. Er la situaziun da la pandemia en China ed ils lockdowns han chaschunà problems.
Sco l'interpresa scriva, giajan ins vinavant la via cun spezialitads e cuntinueschia perquai er cun ils projects d'expander. Er a Domat vegn investì vinavant – là vegnan investids total 300 milliuns per engrondir la capacitad. Er en auters lieus vegn dentant engrondì – tranter auter en China.
Per la segunda mesadad dal 2022 spetga la Ems Chemie che las malsegirezzas tar ils consuments duessan puspè sa quietar sin il martgà da vendita. Per l'entir onn 2022 quinta l'Ems Chemie cun ina levet meglra svieuta che l'onn passà ed il meglier resultat da fatschenta.
