L’interpresa declera l’augment cunzunt cun il bun clima da consum, e che tut lur segments da clientella haja in grond interess per ils products da la Ems Chemie. En tut las regiuns hai dà in svilup positiv, cunzunt dentant en la China ed en ils Stadis Unids da l’America.
La Ems Chemie senta er ch’ils pretschs d’energia e da materias primas èn creschids fermamain. Perquai saja l’interpresa stada sfurzada d’auzar ils pretschs per ils clients. Tut lur filialas sin l’entir mund sajan dentant vinavant ablas da furnir.
La mancanza da chips
In pau mal il venter fa a la Ems Chemie la malsegirezza en il sectur d’automobils, nua che l’interpresa fa 60 pertschient da la svieuta. La mancanza da chips saja vinavant in grond problem per la branscha, ed impedeschia che quella possia sa revegnir – ha scrit la Ems Chemie.
