Ad Arosa ha il chantun terminà il test da corona da massa. L'evaluaziun da 2'794 tests mussia che las infecziuns èn capitadas principalmain en scola, communitgescha l'Uffizi da sanadad.
Tenor la bilantscha intermediara han ins pudì confermar 76 infecziuns da corona, da quai 63 mutaziuns. Cunquai ch'ils cas positivs èn principalmain vegnids chattads tar scolaras e scolars, geniturs e magistraglia ha l'Uffizi da sanadad decidì d'abolir las mesiras da protecziun pli severas sco per exempel l'obligatori general da purtar ina mascrina ad Arosa. La scola d'Arosa resta dentant serrada fin sonda ils 6 da favrer e tuttas scolaras e scolars restan en quarantina.
Tras quest test saja sa mussà ch'i haja en la gruppa da vegliadetgna tranter tschintg ed 11 onns ils pli blers cas, uschia il schef dal stab da crisa dal chantun, Martin Bühler. En questa gruppa sajan las persunas fitg mobilas ed ils uffants na portian nagina mascra. Gist en connex cun la mutaziun dal virus saja uss da ponderar bain co ch'ins giaja enturn cun quest fatg. Cler è per Bühler ch'els hajan d'adattar il concept da protecziun e da testar vinavant – era en las scolas. L'exempel d'Arosa mussia che la derasaziun dal virus mutà giaja fitg svelt ed ins stoppia reagir svelt.
Mardi passà avev'ins constatà la derasaziun da la mutaziun dal coronavirus ad Arosa. Sco mesiras immediatas han ins serrà la scola, las scolas da skis ad Arosa, la colliaziun dals territoris da skis Arosa e Lai ed introducì in obligatori general da purtar mascrina.
