Aita Zanetti e Marcus Beer dirigian en l’avegnir las vischnancas da Scuol ed Ilanz/Glion. Cun l’elecziun dad oz han els surpiglià in grond burdi.
Las parallelas
Malgrà la distanza geografica datti bleras parallelas tranter las duas vischnancas. Omaduas vischnancas èn vegnidas fusiunadas. In construct da pliras fracziuns pli pitschnas cun in lieu principal che ha era funcziun da center regiunal. La fusiun da Glion è entrada en vigur 2014, la fusiun da Scuol 2015. Cun stgars 5’000 abitantas ed abitants s’audan omaduas vischnancas tranter las grondas en il Grischun.
La situaziun tendida
En omaduas vischnancas è la situaziun politica stada tendida ils ultims onns. Pliras fatschentas han chaschunà discussiuns animadas ed i ha adina puspè dà opposiziun cunter fatschentas da la suprastanza communala. In exempel communabel è per exempel l’urden da parcar. Pajar per parcar, parcar gratuit, las medemas reglas en las fracziuns sco en il center? Dumondas che han chaschunà grondas discussiuns a Scuol ed a Glion.
A Scuol hai dà ina iniziativa per dapli transparenza sin nivel communal: Votantas e votants vulan savair tge che las autoritads fan, tut duai daventar pli transparent e chapaivel. A Glion è ina iniziativa reussida che vul midar la constituziun communala: Duai la vischnanca avair in parlament pli pitschen en l’avegnir u turnar a la radunanza communala che bleras fracziuns avevan avant la fusiun?
Questas fatschentas dals ultims onns mussan che la situaziun politica è tendida e ch'ina part da votantas e votants è pulit critica vers l’agir da las autoritads. Fatschentas politicas èn adina puspè vegnidas retardadas ed i va vess da far in pass enavant.
Las sfidas spetgan
Cun Aita Zanetti (AdC) sco capo da Scuol e Marcus Beer (independent) sco president communal da Glion cumenza ina nova èra. Omadus han gudagnà il cumbat. Lur cuntracandidats han dentant fatg fitg bleras vuschs e questas vuschs na vegnan betg a taschair ils proxims onns e persequitar cun egl critic l’agir dals novs.
«Scua nova, scua bain» – il temp da grazia è dentant limità. Omadus dovran in fitg bun maun, bun inschign e surtut ina buna communicaziun cun la populaziun per vegnir in pass enavant en lur vischnancas. Sche quai na gartegia betg da bell’entschatta, lura daventi stentus. Er sche la fusiun da las duas vischnancas è ida en vigur gia avant 8, resp. 7 onns, dovri anc blera lavur da far or da quests dus constructs duas vischnancas omogenas. Aita Zanetti e Marcus Beer surpiglian dus posts politics fitg pretensius ed il squitsch envers els è grond.
Valentin Schmed
Manader programmaziun RTR
