In duo tudestg a la testa da la schefredacziun da la chasa da medias Somedia - fa quai surstar che la Somedia va per persunal ordvart la Svizra?
Flavio Bundi: Gea e na. I n'è da princip gea nagut nov ch'ins va per savida ed experientscha ordaifer il Grischun u er ordaifer la Svizra - e quai en ils pli differents secturs. Il medem fenomen enconuschain nus en il Grischun p. ex. er en las vischnancas, nua che nus avain er in u l'auter president communal che vegn si da la Bassa.
E tuttina: n'èsi betg gist per ina chasa da medias regiunala impurtant ch'ella saja ancrada en la regiun?
Bain, tenor mai è quai precis la basa, il fundament per in bun schurnalissem regiunal. Senza enconuschientschas profundas u era la chapientscha per las dumondas, sfidas ed ils quitads da la glieud en la regiun, senza esser collià fermamain cun ed en la regiun, perda il schurnalissem regiunal sia olma: la proximitad cun la glieud.
En il cas da la Somedia vegn vitiers ch'igl è fitg suboptimal, sch'ils responsabels fan anc avant in pèr mais reclama cun «DsRadio vu do» e punctueschan l'impurtanza da la relaziun cun il public indigen e fan canera cunter Roger Schawinski e ses radio, argumentond ch'ins na dovria nagin Turitgais che vegnia ad explitgar il mund. Ed ussa, van era els per persunal qualifitgà sur il cunfin svizzer. Quai fa endament il proverbi enconuschent: «Wer im Glashaus sitzt, sollte nicht mit Steinen werfen.» Igl è be normal ed er chapibel che tut quai dat era reacziuns ed irritaziuns entaifer las redacziuns ed era tar il public.
Susanne Lebrument discurra en l'intervista davart la transfurmaziun digitala, davart «Nutzerwertgruppen» e da resguardar anc dapli ils basegns da lecturas e lecturs. Tge munta quai concret?
Concret dovra la Somedia ina soluziun co far raps – cunzunt era cun la purschida digitala. In sguard en la gasetta «Bündner Zeitung» dals ultims dis mussa co la Somedia vul restar attractiva per il public: i dat dapli intervistas, dapli service en furma da tocs explicativs, dumondas curtas e respostas, temas captivants sco True-Crime, dapli reacziuns da glieud sin via, dapli purtrets da persunas en general, dapli fotografias – tut furmas e temas ch'interessan in vast public. Furmas che pledentan ils basegns differents dal public e che funcziunan era en furma digitala. Tut quai n'è nagut nov, tenor quest model lavuran las bleras chasas da medias dapi onns.
Quai che dat en egl è dentant ch'i vegn discurrì bler da la digitalisaziun e da la transfurmaziun - dal cuntegn u era da la funcziun ubain rolla d'ina chasa da medias per ina societad però quasi mai. E quai è tenor mai il grond privel. Sch'ins scriva – ditg provocativ – mo anc quai che la glieud vul leger, è quai privlus. Il public na sa betg pli per tge ch'ina chasa da medias stat, tut vegn remplazzabel e previsibel ed in cler profil manca.
Ma ins pudess era dir: sch'i reussescha da survegnir dapli clics u da cuntentar meglier il public, sa tracti d'in model da success?
Il schurnalissem regiunal na viva betg mo da l'analisa da datas e da profils d'utilisaders, mabain d'in vair sensori per la regiun. Per ina societad èsi da grond'impurtanza d'esser confruntada era vinavant cun autras opiniuns, cun analisas che inizieschan las debattas. Las chasas da medias (regiunalas) fan era part da la societad. Per accumpagnar ina societad, dar impuls, identifitgar e moderar debattas èsi perquai tant pli impurtant da prender serius il public, ma era da confruntar el vinavant cun opiniuns e tematicas che n'interessan forsa betg a prima vista il public. Be uschia pon medias promover ina convivenza ed er ina chapientscha vicendaivla a lunga vista, ina da las funcziuns las pli impurtantas da nus medias.
Flavio Bundi
schefredactur RTR
Tge è Vossa opiniun? Jau ma legrel sin il barat: flavio.bundi@rtr.ch
