Er il schaner han persunas ch'han prendì a fit in'abitaziun en Svizra stuì dar ora dapli daners. Ils tschains per abitaziuns scrittas ora èn creschids vinavant, sco las cifras evaluadas da Homegate e da la Banca chantunala turitgaisa mussan.
Il pli ferm èn ils tschains creschids il mais passà, cumpareglià cun il schaner 2023 en il chantun Grischun, cun in plus da 8,5%. Var 7% pli auts èn ils tschains per abitaziuns en ils chantuns da Zug e da Turitg.
Betg dapertut be augments
La analisa dals pretschs sa basa sin ils tschains d'abitaziuns scrittas or da nov. En cumparegliaziun cun ils pretschs dal mais passà hai er dà midadas. Quellas èn per part er differentas cumpareglia cun il svilup durant in onn. Per part hai er dà sminuziuns, per exempel en il chantun Sviz (-2,6%), Glaruna (-1,7%) e Basilea citad (-0,4%). Creschids, dentant betg uschè ferm - en ils tschains en Sutsilvania (+3,7%), en il Vallais (+2,6%) ed en omadus Appenzell (+2,5%).
Aifer l'entir onn èn cunzunt ils pretschs en la citad da Turitg creschids marcantamain. 11,5% pli auts èn ils tschains d'abitaziuns scrittas ora stads il schaner 2024. En autras citads, sco a Genevra (+5,2%), a Lucerna (+4,8%) ed a Berna (+4,8%) èn ils augments main gronds.
