L'Uniun purila grischuna pretenda dapli segirezza da planisar e perspectivas onestas. Ins sustegnia tut ils acturs che gidian da moda constructiva da meglierar la situaziun finanziala, economica e sociala da famiglias purilas, communitgescha l'Uniun purila grischuna. Las mesiras da spargn da la Confederaziun na vegnian ins però betg ad acceptar e las cumbatter cun tut ils meds politics a disposiziun. Perquai sustegna l'uniun ina petiziun che pretenda:
- Dapli renconuschientscha per las las diversas rollas da l'agricultura, da ses engaschament e sia producziun da victualias.
- Nagins programs da spargn sin donn e cust da l'agricultura.
- Auzar ils pretschs dals producents e crear pretschs che sa basan sin ils custs effectivs.
- Nagins ulteriuras cundiziun en il sectur da l'ambient, sch'ellas na vegnan betg recumpensadas.
- Resguardar la realitad e la situaziun da las famiglias purilas.
Questa petiziun inoltrada da l'Uniun purila svizra tar il Cussegl federal duai servir sco basa per la politica agrara e per las tractativas vegnentas en il martgà.
Confederaziun sto e vul reducir expensas
En il rom da la sanaziun da las finanzas federalas ha il Cussegl federal decidì reducziuns linearas supplementaras da 350 milliuns francs. Tranter auter en ils secturs da la collavuraziun internaziunala, la cultura, il traffic da persunas regiunal, l'ambient, la promoziun dal lieu, l'administraziun e l'agricultura.
Actualmain quinta la Confederaziun cun deficits annuals da milliardas enfin il 2028. Tenor il Cussegl federal surtut tras expensas pli autas per l'AVS, tar la reducziun da premias, tar l'armada e tar la tgira d'uffants. Perquai vul la regenza federala examinar da rudent tut sias incumbensas e las subvenziuns. Fin la fin da mars vul il departament federal da finanzas preschentar in concept per sanar las finanzas. Tenor el èn ils problems plitost da natira structurala.
