Il Succurs d'enviern dal Grischun ha approvà 157 dumondas da sustegn durant l'onn da gestiun 2023/2024. 106 da las dumondas approvadas èn vegnidas inoltradas da famiglias u da famiglias d'in genitur. Las ulteriuras 45 dumondas èn vegnidas da persunas singulas u da pèrs senza uffants. Tut en tut han var 490 persunas profità da las prestaziuns dal Succurs d'enviern dal Grischun.
La consegna da bons per la bursa da velos a Cuira, che ha lieu la primavaira e l'atun, è fitg bainvesida ed è era vegnida nizzegiada savens l'onn da gestiun 2023/2024. En tut èn vegnids distribuids 185 bons per velos. Prestaziuns materialas sco satgs da scola, pachets da vestgadira ed era letgs èn vinavant contribuziuns da sustegn bainvesidas dal Succurs d'enviern dal Grischun. Medemamain han var 350 famiglias, pèrs e persunas singulas survegnì ina surpraisa da Nadal en furma d'ina pitschna summa da daners.
