La chareschia ed ils custs che creschan en divers champs sco l'energia, ils tschains u las victualias strapatschan il budget da blers umans en Svizra. Cunzunt persunas ch'èn gia pertutgadas da povradad u èn al cunfin da povradad tutga la chareschia fermamain. Il Succurs d'enviern ha perquai er quest onn puspè sustegnì diversas famiglias e persunas singulas.
175 dumondas per sustegn
Durant l'onn da fatschenta 2022 e 2023 ha il Succurs d'enviern grischun survegnì 175 dumondas d'agid. 10% da quellas èn vegnidas refusadas, scriva il Succurs d'enviern en sia communicaziun. Sper quai hajan 335 famiglias e persunas survegnì in daner da Nadal e 145 persunas hajan pudì cumprar per in pretsch reducì in velo a la bursa da velos. Sper questas purschidas reparta il succurs er mintga onn material da scola u pachets da vestgadira. En tut ha il Succurs d'enviern dal Grischun dà sustegn material e finanzial en la valur da 151'000 francs.
