73 accidents dapli che l'onn 2022 hai dà en il chantun Grischun l'onn passà. Er cumpareglià cun la media dals onns 2018 enfin 2022 haja dà en media levamain dapli accidents, scriva la Polizia chantunala. Da resguardar saja dentant er ch'il dumber da vehichels è creschì l'onn passà en il Grischun. En tut èn mortas 17 persunas e 610 èn vegnidas blessadas.
Nus avain adina dapli traffic sin via, pervia da quai datti era dapli accidents. Da l'auter maun duessan ils autos era vegnir adina pli segirs.
Damain accidents cun motos e sut influenza d'alcohol
Las cifras mussan però er ch'i ha dà marcantamain damain accidents cun töfs. Cun 165 accidents è il dumber sa reducì per prest 13%. Er accidents sut influenza d'alcohol hai dà pli paucs. En tut 99 accidents cun alcohol, quai èn 16% pli pauc che anc l'onn avant.
Dumber d'unfrendas en entira Svizra sin aut nivel
Gia l'emna passada aveva l'Uffizi federal per vias Astra fatg bilantscha dals accidents en l'entira Svizra. Tenor quel è il dumber d'accidents mortals sin las vias sin in aut nivel, cun 236 persunas mortas il 2023. Er il dumber da persunas grevblessadas è s'augmentà cumpareglià cun l'onn avant, quel è guardà sin tut la Svizra tar passa 4'000 cas.
La prevenziun cumainza baud
Ils pli blers accidents capitan en regiuns populadas, sin vias maistras e durant temps da pendular, vul dir la damaun, il mezdi e la saira. Ils motivs principals èn ina sveltezza betg adattada a la situaziun, ignorar la precedenza da dretga ed inattenziun. Surtut la precedenza ignorada ch'è s'augmentada per radund 18%, procura per mal il chau. Pervia da quai datti la lavur da prevenziun.
Nus cumenzain gia en las scolas a declerar la precedenza da dretga
La prevenziun datti en furma da campagnas d'infurmaziun, controllas al lieu, visitas a scola u cun flyers per geniturs e persunas d'instrucziun. Quant effectivas che las campagnas èn, saja grev da mesirar. Ellas vegnan dentant adina adattadas a las tendenzas actualas.
