Il victur è conuschent. Livio Müller da la Turgovia è il meglier electroinstallatur da la regiun orientala. Questa victoria permetta ad el da sa participar al campiunadi naziunal, als Swiss Skills. Quels han lieu il settember a Berna. Er il segund da la concurrenza dastga sa legrar d'ina participaziun als Swiss Skills. E cuntanschì quest plaz ha in Grischun, numnadamain Joel Rusterholz.
Jau na poss gnanc anc crair.
Il campiunadi regiunal da mastergns è stà ina part da la HIGA da quest onn. Ils visitaders e las visitadras da l'exposiziun da commerzi, industria e mastergn han pudì observar ils participants sur las spatlas. Cunquai che quels stuevan però lavurar fitg focussà, purtavan tut ils otg candidats ina protecziun da l'udida.
Concentraziun cumplaina tar ils candidats
-
Bild 1 von 3. I vegn lavurà precis. Otg candidats cumbattan per in ticket da Swiss Skills. Bildquelle: Uniun dals electricists grischuns.
-
Bild 2 von 3. Installaziun da l'armatura. Joel Rusterholz lavura plain focussà. Bildquelle: Uniun dals electricists grischuns.
-
Bild 3 von 3. Campiunadi regiunal da mastergns. Lavurar exact e tuttina svelt è dumandà al campiunadi regiunal. Bildquelle: Uniun dals electricists grischuns.
Las infurmaziuns han las visitadras ed ils visitaders survegnì dals commembers da l'Uniun dals electricists grischuns E.I.T. Tranter quels era il president da l'uniun grischuna, Claudio Cadruvi. Il motiv che quest campiunadi è stà en in lieu public e betg en ina stanza quieta, è prescrit da l'uniun svizra. Ultra da quai saja quai buna reclama per la professiun d'electricist, ha Claudio Cadruvi manegià. Quai saja impurtant, er en questa professiun regia numnadamain ina mancanza da persunal dal fatg.
Ins saja cuntent cun la realisaziun dal campiunadi, han ditg ils organisaturs. Er per ils otg candidats saja stat in temp intensiv, ma er plain tensiun. Ils dus megliers pon gea ir al campiunadi svizzer ch'è il settember. Ed il meglier electricist da la Svizra po lura sa participar al campiunadi mundial.