Per la segunda giada è la HIGA vegnida averta dal nov team d’organisaturs. Suenter grevs temps ed ina surpigliada atras la citad da Cuira è il nov team part da l’organisaziun. Suenter ina bun’entschatta l’onn passà hajan ins pudì gudagnar quest onn dapli expositurs. Er il concept saja vegnì surlavurà. Cun secturs tematics e cun in gir adattà vul il president da la HIGA, Ivo Frei, porscher insatge no als visitaders.
La HIGA datti dapi 65 onns. Pli baud era ella praticamain l’unica plattafurma da reclama per las interpresas grischunas. Oz pon ins tut quai far online. Plinavant saja tenor Ivo Frei ina sfida da chattar avunda interpresas che vulan exponer. Tuttina saja uschia ina messa anc confurm al temp. I saja anc adina ina plattafurma per restar en contact cun la glieud ed ils gestiunaris da stan badian in effect positiv. Ins stoppia dentant restar modern e na dastgia betg star salda.
