Quest onn po la fundaziun Känguruh festivar il giubileum da 30 onns. Dal 1994 a Malix en ina chasetta ha cumenzà lur istorgia. Lezza giada abitavan 10 fin 15 giuvenils en la chasa ed han gist era fatg là il giarsunadi.
I sa tracta da giuvenils cun per part difficilas circumstanzas u cun problems psichics u problems socials, ch'han fadia da chattar ina plazza en il martga da lavur. Sur l'assicuranza d’invaliditad IV vegnan els alura tar la fundaziun da Känguruh. Là survegnan els sustegn en differentas furmas. Sur ils onns s’ha sviluppà la purschida da Känguruh enormamain. Oz na stattan ils giuvenils betg pli a Malix mabain en abitaziuns a Cuira. En questas abitaziuns cuminaivlas è la damaun e la saira ina pedagoga curativa che gida tar dumondas u era tar problems privats.
Sper las abitaziuns accumpagnadas porschan els cussegliaziuns per giuvenils che na san anc betg tge ch’els vulan far. Sche quai è sclerì, gidan els als giuvenils a chattar ina plazza da giarsunadi. Känguruh porscha sez giarsunadis da falegnam, pictur u ortulan. Sper quai lavuran els er ensemen cun auters affars per chattar lieus adattads per ils giuvenils.
L’avegnir da Känguruh è dentant anc intschert. En ils ultims onns han els adina puspè gì da cumbatter cun las finanzas. Sco menziunà vegnan ils giuvenils sur la IV tar Känguruh. Pia paja la IV contribuziuns als giuvenils, ma nagut a la fundaziun sezza. E mo las contribuziuns da la IV èn memia pauc per pudair mantegnair la purschida. Uschia han els gì da chattar agid d’autras fundaziuns, il chantun na paja numnadamain naginas contribuziuns.
Da mai fissi in giavisch ch’ins na stoppia betg vegnir bullà malsaun per vegnir tar la IV avant ch’ins po duvrar la purschida da Känguruh.
Opiniun da professura per pedagogia speziala
Silvia Pool Maag è professura a la scol’auta da pedagogia a Turitg ed è s'occupada en general cun las sfidas per giuvenils che vegnan ord scola. Ella di, che la transiziun po per giuvenils esser greva. En questa vegliadetgna cumparan ina massa dumondas d’identitad. Tgi sun jau? Tge vuless jau? Sper tut las dumondas che vulan respostas reageschan giuvenils era pli sensibel sin quai che capita sin il mund. Els èn en ina fasa vulnerabla e dovran sustegn famigliar per chattar lur lieu.
Per blers è il sustegn grond, ed els chattan lur via. Ma sch'il sustegn da chasa manca u sch'ils geniturs na san betg co gidar lura podessi vegnir grev. La professura di ch'i fiss da bajegiar ora las purschidas simplas ed accessiblas durant ch'ils uffants èn anc en scola. Quai fissan quasi mesiras preventivas per evitar che giuvenils vegnan ord scola d èn dependents da contribuziuns da l'assicuranza d’invaliditad.
Per prevenziun na datti simplamain nagins raps.
Or da l'archiv:
