A l'entschatta da la guerra en l'Ucraina èn ils Russ avanzads fitg spert fin avant la chapitala Kiev. En curt temp han els pudì conquistar pli gronds territoris en il sid ed il ost dal pajajs. Uschia resumescha David Nauer, ch'è correspondent per l'Ucraina e la Russia tar SRF, il cumenzament.
Retrospectiva dal correspundent da l'exteriur
Gia suenter ils emprims mais haja la dinamica da la guerra cumenzà a sa midar; ils Ucranais hajan pudì franar e chatschar enavos ils Russ. Durant l'entir onn 2022 haja l'Ucraina pudì reconquistar circa la mesadad dal terren occupà.
L'onn passà, il 2023, saja stà l'onn da la dischillusiun per la vart ucranaisa. La speranza da pudair reconquistar vinavant terren occupà na saja betg s'ademplida, perquai che l'armada russa ha sa defendì fitg bain. Tenor Nauer ch'è er sez adina puspè stà en l'Ucraina, haja la Russia installà buns indrizs da defensiun surtut en il sid en ils lieus da cumbat ils pli ferms.
Ils ultims mais saja la situaziun per l'Ucraina anc ina giada vegnida pli difficila. Per l'ina perquai che l'agid dad armas dal vest saja ì enavos e per l'aura perquai che la schuldada manchia. Uschia che l'Ucraina na possia betg pli cumbatter cun forzas cumplainas. A parts da la front sajan las attatgas russas intensivas.
Avant curt han ils Ucranais stuì sa retrair or da la citad Awdijiwka en l'ost dal pajais. L'Ucraina stettia actualmain sut grond squitsch e stoppia sperar sin furniziuns da muniziun ed artigliaria dal vest. La front possian ins actualmain tegnair.
Suenter l'entschatta da la guerra en l'Ucraina saja la situaziun tar ils servetschs socials stada speziala, di la manadra Susanna Gadient. La fin mars 2022 hajan ins gì en cussegliaziun circa 250 persunas, lura haja dà in grond svilup; la fin avrigl sajan quai stadas prest 800 persunas. Ina situaziun sumeglianta n'hajan ins anc mai gì. Surtut las dimensiuns ed il quantum da lavur sajan stads insatge tut nov. Suenter saja il dumber sa stabilisà, schizunt ì enavos in zic. I dettia cas che na dovrian betg pli il sustegn dal servetsch social, ina part saja turnada en patria. A partir dal mars da l'onn passà saja il dumber da persunas da l'Ucraina constant. En las cussegliaziuns dal servetsch social èn actualmain circa 900 persunas che vegnan sustegnidas. Quellas vivian en in'atgna abitaziun ed ina pitschna part tar ina famiglia. Repartidas èn las persunas da l'Ucraina en l'entir chantun – quai saja in cas spezial, di Susanna Gadient. Normalmain sa chaseschian persunas da l'exteriur datiers dals gronds lieus, pia da Landquart fin a Tusaun.
L'entschatta hajan tuts pensà ch'i na giaja forsa betg uschè ditg fin ch'ins possia puspè turnar en la patria. Dentant dus onns suenter saja d'acceptar la situaziun sco ch'ella saja e che las persunas da l'Ucraina stettian forsa qua pli ditg che pensà. Quai che saja sa midà il pli fitg per las persunas da l'Ucraina e ch'i saja daventà pli impurtant sch'ins possia lavurar u sch'ins possia ir en scola. Pia sajan las sfidas che tuts han en il mintgadi vegnidas pli impurtantas, entant ch'i gieva l'entschatta en emprima lingia simplamain per avair in suttetg ed esser en segirtad.