Ulf Wendler è dapi il 2006 l'archivar da la citad. El enconuscha l'istorgia da Cuira sco paucs auters. El guarda enavos sin il svilup da Cuira entaifer ils 200 onns sco chapitala dal Grischun.
1820 - 1900
Enturn la midada dal temp al 19avel tschientaner vivevan enturn 3'200 persunas a Cuira. Cura che Cuira è daventada la chapitala dal chantun, sa limitava la surfatscha d’abitar be sin la citad veglia. Era da lezzas uras aveva Cuira ina gronda muntada. Quella giada passavan numnadamain blers commerziants tras Cuira per ir a la fieras da Milaun u Venezia.
Toc a toc èn lura naschidas las instituziuns chantunalas e l’infrastructura è vegnida sanada. La citad veglia era anc circumdada da mirs e da las portas da la citad. Cunquai che la citad sa finanziava tras l’agricultura sa chattavan prads enturn la citad. Perquai che la populaziun è lura creschida aifer paucs onns rapid sin il dubel, è il mir vegnì stgarpà giu fin il 1861.
Cun la construcziun da la staziun l’onn 1858 ha Cuira survegnì l’emprima colliaziun cun la Bassa. Davent da quest mument è Cuira sa sviluppà sur ils cunfins da la citad veglia ora. Cuira crescha ad in crescher.
Da quel temp vegnan realisadas fabricas da gas, la caserna Rossboden ed ulteriurs biros. 1871 survegn Cuira ses emprim bogn avert. Vers la midada al 20avel tschientaner ha Cuira ina populaziun da passa 10’000 persunas.
1900 -2020
Fin il 20avel tschientaner n'aveva Cuira nagina chanalisaziun. Tenor Ulf Wendler aveva Cuira in grond problem d'igiena. La regenza è lura stada sfurzada da midar questa situaziun ed il grond project da mamut è vegnì terminà fin il 1905.
Silsuenter è anc la scola publica «Quader» vegnida tiers. Tenor l’archivar haja Cuira pudì sa dustar da las duas guerras mundialas. L’economia saja dentant tuttina vegnida franada durant quest temp, tuttina sco en la gronda part da las ulteriuras citads en Svizra.
-
Bild 1 von 2Legenda: Il Hotel Steinbock enturn l'onn 1930. Oz sa chatta là il center da cumpra Steinbock. nossaistorgia.ch / Alberto Rainolter.
-
Bild 2 von 2Legenda: Ina staziun dad auto da posta amez la citad (Enturn 1930). nossaistorgia.ch / Flavio Huonder
Suenter las guerras èsi anc ina giada vegnì tar in «babyboom» ed igl ha dà in ulteriur problem da spazi. Per far frunt a quest problem saja lura era il quartier dal Rain vegnì bajegià ora. Ed uschia sajan ils quartiers «Lacuna» e «Solaria» naschids. Dapi lura stagnescha la populaziun da Cuira sin enturn 37’000 persunas.