«Queerbünda Gründa» è il motto da «Khur Pride» 2024. Igl è la suletta manifestaziun per persunas queeras el chantun Grischun. Avant dus onns hai dà la premiera – cun passa 1'000 participantas e participants.
Quest onn vulan las organisaturas ed ils organisaturs giugar cun ils maletgs stereotips dal Grischun. Lur animal da simbol è la vatga Petrasilia Capuns ch'è el medem mument era la cassa da l'uniun. Da chattar avunda daners e persunas voluntarias na saja numnadamain betg simpel, di Nic Senften ch'è responsabels per il program da la «Khur Pride».
La communitad queera en il Grischun è gia plitost pitschna ed uschia èsi pli grev da crear ina rait da contacts.
Els speran dad anc chattar intgins voluntaris e voluntarias e Nic Senften menziuna era ils uschenumnadas «allys», ils alliads, pia persunas betg queeras che s'engaschan per la communitad, sajan bainvegnids.
Decoraziun fatga a maun e cun bler colur
Per render attent sin ellas ed els èn var 10 persunas sa messas ensemen la sonda passada per zambregiar placats e decoraziun per la manifestaziun da l'entschatta zercladur.
En general sajan las persunas en il Grischun plitost discretas e na veglian betg crudar si – uschia era la communitad queera. Gest perquai saja impurtant da porscher in lieu nua ch'els possian s'exprimer senza stuair avair tema da vegnir discriminads, manegia da co-presidenta Bianca Gansner. Ella sco dunna queera saja savens sa sentida suletta ed avant dus onns gì usche plaschair da vesair tantas persunas a la «Khur Pride». Usche plaschair ch'ella saja sa decidida da s'engaschar en la suprastanza da l'uniun.
Tge purschidas vegni anc a dar en l'avegnir?
Avant trais emnas hai dà schletas novitads per la communitad queera grischuna. Il manader dal local da sentupada Sozialwerk LGBT+ a Cuera ed a Buchs e ses um ch'era en suprastanza da l'uniun duein avair gì contact sexual cun plirs visitaders minorens. In anteriur commember da la suprastanza ha denunzià il pèrin homosexual a la procura publica da Son Gagl. Era Nic Senften è stà consternà cura ch'el ha udì quellas novitads e di ch'i saja impurtant ch'i dettia vinavant in lieu nua che la giuventetgna queera grischuna possia s'inscuntrar. Il local da sentupada saja il sulet lieu constant per quellas persunas. Perquai vegni el era ad esser preschents cura che la citad da Cuira s'inscuntra mez matg cun ils giuvenils queers per discutar lur basegns e giavischs.
