La rumida da l’anteriur deposit da muniziun da l’armada a Mitholz en il chantun da Berna ha prendì in ulteriur obstachel. Suenter il Cussegl naziunal ha era il Cussegl dals chantuns approvà il credit d'impegn da 2,59 milliardas. Cun 39 cunter 0 vuschs e 3 abstenziuns ha la Chombra pitschna ditg Gea al credit d'impegn. Ins po ussa realisar il project che cuzza dapli che 25 onns.
En il deposit da muniziun sutterran Mitholz hai dà il 1947 in’explosiun. Il 2018 èn expertas ed experts vegnids tar la conclusiun ch'il privel en connex cun las restanzas da muniziun saja pli grond che spetgà e ch'ins stoppia rumir l'anteriur deposit.
Abitantas ed abitants ston bandunar lur chasas
Il project che dura passa 25 onns duai eliminar il privel d'ulteriuras explosiuns en l'anteriura galaria da viafier ed en il cugn da cultira avant l'implant. Plinavant prevesa el da rumir las restanzas da material explosiv, da metals grevs e da restanzas d'incendi en l’entir territori pertutgà da l'explosiun da l'onn 1947.
Ultra da quai vegnan construids in tunnel da protecziun per la via naziunala ed ina galaria per la lingia da viafier. Vitiers vegnan mesiras, cun las qualas vegn protegida l'infrastructura da privels da natira sco lavinas, auas grondas, bovas u crudada da crappa. Questas mesiras vegnan ad exister suenter che las rumidas èn terminadas.
Ils emprims abitants e las emprimas abitantas da Mitholz avessan gia dad ir davent il 2025 pervi da las lavurs, e lura pli tard il 2030 fissi uschè lunsch per ils auters. Pertutgadas da la partenza fissan var 50 persunas en il perimeter da segirtad.
