La Viafier retica scriva danovamain cifras da record. Il gudogn è creschì il 2024 sin 17,1 milliuns francs – suenter 13 milliuns francs l'onn avant. Quai communitgescha l'interpresa da viafier grischuna. In record haja dà tant tar il transport da persunas sco er tar il transport d'autos.
Il 2024 haja la Retica transportà 11% dapli giasts. In augment marcant haja surtut dà sin la lingia dal Bernina Express cun in plus da 30%. Il transport d'autos saja creschì sin 560’415 vehichels – medemamain tants sco anc mai.
In motiv per il grond success è segiramain la meglra purschida d'urari.
Damai che la Viafier retica ha transportà dapli persunas, è la punctualitad vegnida in zic mendra. In ulteriur motiv per ils retards sajan stads ils differents plazzals sin la lingia da viafier, scriva l'interpresa.
Dapli investiziuns
Il 2024 ha la Viafier retica fatg investiziuns da 387,1 milliuns francs – cumpareglià cun 359,7 milliuns francs il 2023. En il mantegniment ed engrondiment da l'infrastructura ha la Retica investì 265,8 milliuns francs.
La dumonda crescha il mument a moda uschè burascusa, ch'i n'è betg garantì ch'igl è adina pussaivel da porscher tut las colliaziuns.
Prognosas restan positivas
Er l'onn current haja cumenzà tenor giavisch, hai num. La dumonda saja s'augmentada vinavant, cunzunt tar il traffic da persunas. Ed era la punctualitad saja vegnida meglra, cun in plus da 7,1%.