Nua han ins gia chattà il virus? Fin uss èn s'infectadas var 80'000 persunas sin tut il mund cun il virus da Corona (CONVID-19). Mortas dal virus èn per il mument var 2'600 persunas, quai surtut en pajais asiatics. En l'Europa han ins fin uss cumprovà circa 200 cas. Quai en l'Italia (157), la Germania (16), Frantscha (12) e Gronda Britannia (9). Singuls cas datti er en Spagna, Belgia, Finlanda e Svezia.
En Svizra ha l'Uffizi federal da sanadad entant confermà l'emprim cas da Corona.
Infecziun: Ins haja ditg pensà ch’il virus vegnia surdà da l'animal a l'uman, ma il virus po era vegnir dà vinavant dad uman ad uman. Quai capita entras daguts, per exempel cun starnidar u tusser. Pia sco tar ina grippa normala era. Dal mument ch'ins s'infectescha cun il virus vai circa in'emna, fin ch'ils sintoms sa mussan.
Dapli infurmaziuns porscha per exempel la Confederaziun
Sintoms: Il virus da Corona chaschuna infecziuns en il tract respiratoric, quai munta tranter auter en il nas, en la gula, en la giargiatta u en las bronchias. Savens sajan ils sintoms moderads, ma i dat er cas, nua ch'il virus sa sviluppa a malcostas mortalas. Vinavant saja difficil da dir co exact ch'il virus sa derasia e tge svilup da malsogna ch’il virus haja exact, di l’infecziologa da l'Ospital chantunal a Cuira.
Privel: Il ristg ch'ins s'infectescha en Svizra cun il virus da Corona è vinavant bass. Tenor l'Uffizi federal da sanadad sajan la Confederaziun, ils chantuns sco er il provediment da sanadad preparads.
E per tgi ch’è en la China sin viadi: Per lezs ha Alexia Cusini anc in pèr tips: lavar savens ils mauns e betg ir en fullas da persunas. Vinavant, uschia l’Organisaziun mundiala per sanadad WHO, na duess ins en la China betg ir datiers d'animals – ni d'animals selvadis ni da quels sin bains purils.
RTR actualitad 11:00
