Suenter che passa 60% dals districts electorals ad Iowa èn dumbrads ora, maina Pete Buttigieg. Quai ha communitgà la Partida democratica en la chapitala Des Moines. Pete Buttigieg è l'anteriur president da la citad South Bend en il stadi federativ dad Indiana. Cun 38 onns è el er il pli giuven dals candidats dals democrats.
Sin il segund plaz suonda il senatur Bernie Sanders. Sin il terz plaz la senatura Elizabeth Warren e sin il quart plaz l’anteriur vicepresident Joe Biden.
Cura ch'ils resultats finals vegnan publitgads, n'è anc betg enconuschent.
Tar las preelecziuns voteschan democrats e republicans davart il meglier candidat per la presidenza da lur partida. Tar ils democrats è la situaziun interessanta, cunquai ch’i dat 11 candidats. Tar ils republicans ha il president en uffizi, Donald Trump, gudagnà cleramain ad Iowa.
Ils 11 da favrer suondan las proximas preelecziuns a New Hampshire. L'elecziun dal president u da la presidenta è lura ils 3 da november.
RTR novitads 06:00
