Update Ucraina - Corea dal Sid ponderescha da trametter armas a l'Ucraina
Ils 24 da favrer 2022 ha la Russia cumenzà l’invasiun militara da l’Ucraina. Tenor la Russia saja quai ina reacziun sin il privel tras la NATO. Ils pajas dal vest han crititgà l'attatga e dattan divers sustegns a l’Ucraina. Dapi lura furiescha ina guerra en l’Ucraina cun blers fugitivs.
La Corea dal Sid ponderescha da trametter armas a l'Ucraina sco reacziun sin la relaziun militara pli intensiva tranter la Corea dal Nord e la Russia. Quai ha l'uffizi presidial a Seoul communitgà. L'emprim saja previs da trametter armas per l'atgna defensiun. Sch'ins survegnia dentant l'impressiun ch'i giajan memia lunsch, possian ins era considerar in engaschi offensiv. L'emna passada aveva il servetsch secret sidcorean pretendì d'avair infurmaziuns che la Corea dal Nord haja tramess 1'500 schuldads en la Russia, probabel per preparar els per in cumbat en l'Ucraina.
20 d'october
La notg passada hai da pliras attatgas vicendaivlas. Da la vart ucranaisa hai num ch’il militar russ haja attatgà cun rachetas la citad da Krywyj Rih en il sidost da l’Ucraina. Almain 17 persunas sajan sa blessadas. Plinavant sajan pliras dronas russas vegnidas sajettadas giu sur e datiers da la citad da Kiew. La Russia da sia vart ha communitgà che l’Ucraina haja attatgà il territori russ cun dronas. 110 rachetas ucranaisas sajan vegnidas sajettadas giu, tranter auter era datiers da Moscau.
La Norvegia sustegna l’Ucraina cun 260 milliuns dollars. Quest pachet d’agid duaja sustegnair il sectur d’energia en vista a l’enviern. En ses messadi per video ha il president ucranais Wolodimir Selenski engrazià a la Norvegia. Da reconstruir ovras destruidas e da procurar per in’infrastructura moderna saja fitg impurtant en questa situaziun, ha ditg Selenski. Ils ultims mais ha la Russi surtut prendì en mira l'infrastructura critica dal pajais vischin.
17 d'october
Trais vehichels per rumir minas vegnan furnids da la Svizra a l’Ucraina. La Confederaziun veglia vinavant far ses pensums, ha la presidenta da la Confederaziun Viola Amherd ditg al cumenzament da l’inscunter per rumir minas en l’Ucraina. Quel ha cumenzà oz, gievgia a Losanna. In'interpresa svizra vegn a construir las maschinas, ella collavura stretg cun las Naziuns Unidas ed organisaziuns nunguvernamentalas. Fin il 2025 duain radund 100 talas maschinas esser en acziun en l’Ucraina, la Confederaziun prevesa da far fin il 2027 investiziuns en quest connex da 100 milliuns francs.
5 d'october
Il president ucranais Wolodimir Selenski ha annunzià via il portal Telegram da vulair preschentar ils plans da victoria ils 12 d’october al proxim inscunter da la uschenumnada gruppa da contact Ramstein. Il plan prevesia pass concrets per vegnir tar ina fin da la guerra. Gia la fin settember aveva Selenski durant sia visita en il Stadis Unids surdà il plan al president american Joe Biden, sco era als dus candidats per il presidi american. In pledader dal ministeri da l’exteriur american aveva discurri da propostas productivas.
2 d'october
La citad Wuhledar en l'ost da l'Ucraina è vegnida conquistada da truppas russas. Quai conferma il commando da l'armada ucranaisa. Ins haja cumandà la retraga per proteger persunal e material, hai num sin telegram. L'armada russa aveva gia pliras giadas empruvà da conquistar la citad en la regiun da Donezk en l'ost dal pajais, che valeva durant dus onns sco ferma bastiun da l'Ucraina.
Prim d'october
Tenor il president ucranais Wolodirmir Selensky è la situaziun a la front tendida. Las circumstanzas sajan fitg grevas, ha el ditg en ses messadi da video quotidian. Latiers è el sa referì sin in inscunter cun cumandants dad aut rang. Quai pertutga mintga singula part da la front sco era las capacitads futuras da l'armada ucranaisa. Las forzas armadas stoppian ussa far tut quai che stettia en lur pussaza.
La Russia planisescha entant da mobilisar ulteriurs 130'000 schuldads, sco quai ch'i resulta d'in decret.
