Ils stadis commembers da l’UE han elegì in nov parlament d’Europa: Tenor emprimas calculaziuns resta l’allianza dal center dretg EVP cun sia top-candidata Ursula von der Leyen la ferma fracziun en il parlament. L’EVP vegn sin passa in quart dals 720 sezs. Gudagnà vitiers han en l’entira Europa las partidas da l’ur dretg, sco la AfD en Germania, ils Fratelli d'Italia ed il Rassemblement National en Frantscha. Quai sin donn e cust dals socialdemocrats, dals liberals e dals verds. En il parlament d’Europa datti uschia – sco spetgà – in spustament a dretga.
En Frantscha ha il president Emmanuel Macron reagì sin la terrada da las elecziuns e schlià l’assamblea naziunala. Ils 30 da zercladur dettia novas elecziuns anticipadas. Quai ha ditg Macron en ses pled a la naziun ier saira tard. Gronda victura è stada la partida da l’extrema dretga da Marine Le Pen. Quella vegn sin radund 32% da las vuschs – passa il dubel da l'allianza dal center da Macron. El sez vegn a restar en uffizi enfin la proxima elecziun dal president il 2027.
Ils resultats dals singuls pajais, dad SRF:
En l'Italia ha la partida da la primministra Giorgia Meloni fatg il meglier resultat – e survegnì radund 26 fin 30% da las vuschs, tenor ina prognosa da RAI. Quai dentant sin donn e cust dals partenaris da coaliziun. La Lega ha be pli survegnì 9%, la davosa giada aveva la partida fatg 34% da las vuschs per il parlament europeic.
En la Germania è l'uniun da CDU e CSU la ferma partida, cun radund 30% da las vuschs. Segund meglier resultat ha la AfD fatg, cun 15,9% – la SPD dal chancelier Olaf Scholz fa il mender resultat tar ina elecziun naziunala, cun 13,9%, 2 puncts procentuals pli pauc che la davosa giada. Prest 9 puncts procentuals perdan ils Verds e fan anc 11,9% da las vuschs.
En l'Austria ha fatg la partida da la dretga FPÖ il meglier resultat (25,7%). Els tutgan tar la fracziun «Identitad e democrazia» dal parlament europeic. Cun 24,7% segund ferma partida è la ÖVP, che perda radund 10 puncts procentuals. Be 1% davos la ÖVP è sa plazzada la SPÖ.
La repartiziun dals sezs en la survista da SRF:
