Il president american Joe Biden ha telefonà cun il president russ Wladimir Putin. Sche la Russia planiseschia per propi in'ivasiun en l'Ucraina, stoppia ella quintar cun ina reacziun immediata dals Stadis Unids e da lur alliads. Silsuenter ha Biden era telefonà cun il president ucranais Wolodymyr Selenskyj cun il medem apell.
Pleds clers era da la Germania
La Russia saja la culpa per l'escalaziun en il conflict cun l'Ucraina. Quai ha ditg Frank-Walter Steinmeier, ch'è vegnì relegì oz sco president tudestg. Plinavant ha el apellà a Putin da tschertgar vinavant il discurs cun l'Uniun Europeica per garantir la pasch.
La Svizra avertescha
Las tensiuns al cunfin fetschian quitads, scriva il Departament federal d'affars exteriurs EDA. La Svizra avertescha perquai da far viadis turistics ubain professiunals en la regiun. Anc na cloma la Svizra dentant betg enavos persunas ord il pajais, sco quai che plirs stadis han gia fatg. La Confederaziun ha dentant actualisà las recumandaziuns per viadis en l'Ucraina.