Neil Armstrong ha scrit istorgia. Sco emprima persuna dal mund ha el mess in pe sin la glina. Ils 20 da fanadur 1969 èsi stà uschè lunsch e la capsla è sa tschentada sin il trabant. Quest eveniment festivescha quest onn ses 55avel giubileum.
Da la partida tar la missiun «Apollo 11» eran sper Armstrong er Edwin «Buzz» Aldrin, il pilot da la navetta lunara, e Michael Collins, il pilot dal modul da cumond.
En la centrala da controlla a Houston han ins mo udì: «The eagle has landed». La navetta lunara è sa tschentada sin la glina. Suenter èn Armstrong ed Aldrin ids sin la glina e Collins è restà en la capsla, che ha circumdà la glina. Turnads èn tuts trais sauns puspè sin la terra.
Onns grevs durant la Guerra fraida
Suenter l'entschatta da la Guerra fraida l'onn 1947 han l'URSS ed ils Stadis Unids cumbattì, tranter auter per la posiziun predominanta en l'univers. Cura che l'Uniun sovietica ha lantschà l'emprim satellit en l'orbit, numnadamain Sputink 1, ed è era stà l'emprim stadi ch'ha purtà ina persuna en l’univers – Juri Gagarin – è la cursa, tgi che saja l'emprim sin la glina, stada lantschada.
Ils Stadis Unids han recuperà. L'anteriur president american John F. Kennedy ha en in pled preschentà sias finamiras. Ils Stadis Unids da l’America èn l’emprim stadi che porta umans sin la glina ed era puspè enavos. Quai entaifer ils proxims 10 onns.
Nus avain tschernì dad ir sin la glina en quest decenni ed anc autras chaussas. Betg perquai ch’igl è simpel, mabain perquai ch’igl è difficil.
