- En vista a la guerra en l'Ucraina èn quasi sa dublegiads ils imports d'armament da l'Europa durant ils ultims tschintg onns.
- Quai resulta d'in rapport che l'institut da perscrutaziun da la pasch a Stockholm Sipri ha publitgà.
- Tenor quel è s'augmentà en l'Europa ils onns 2019 fin 2023 l'import d'armas per 94%, cumpareglià cun la perioda dal 2014 fin il 2018.
- Il commerzi mundial cun armas è sa reducì per 3,3 pertschient.
Pli grond importader en l’Europa è stada en quest connex l’Ucraina – cun 23% da tut ils imports d’armas da la regiun. Dapi dus onns sa dosta il pajais cunter ina guerra d’attatga da la Russia. Sulettamain l’onn 2023 è l’Ucraina stada cun distanza il pli grond importader d’armas dal mund. En la perioda da tschintg onns era il pajais sin l’entir mund sin il quart plaz davos l’India, l’Arabia Saudita ed il Catar.
Las datas da Sipri sa refereschan al volumen da las furniziuns d'armas, betg a la valur finanziala da quellas. Cunquai ch'il volumen po variar fitg dad onn tar onn, tut tenor la situaziun d'incumbensa, metta l'institut independent il focus sin localitads da 5 onns enstagl sin onns singuls.
La Russia n'è betg pli tranter ils pli gronds furniturs d'armas
Ils dus pli impurtants pajais d'export per l'Ucraina èn stads ils Stadis Unids da l'America cun 69% vi da la rauba importada, sco era la Germania cun 30%. Ils exports d'armament da la Germania èn sa reducids en total per 14% ils ultims tschintg onns. Per l'emprima giada dapi decennis n'è la Russia betg pli tranter ils dus pli gronds furniturs d'armas dal mund.
Entant ch’ils Stadis Unids a la testa han augmentà lur exports d’armas per ulteriurs 17% ed han uschia pudì cuvrir 42% da la fiera mundiala, èn las furniziuns da la Russia sa reducidas per passa la mesadad (53%). Surpassà la Russia ha la Frantscha che ha augmentà ses exports per 47%. La Germania è anc adina stada tranter ils top tschintg pajais d’export dal mund. Tut en tut è il transfer d'armas global da tut ils stadis crudà levamain per 3,3%.
