Persunas betg vaccinadas che vulan entrar en l'Austria, dovran a partir da glindesdi in test da PCR. Ils tests svelts d'antigen na vegnan lura betg pli acceptads. In'excepziun èn ils pendularis. Lez dastgan vinavant duvrar tests svelts d'antigen – quels valan lura dentant be pli 24 empè da 48 uras. Ils tests da PCR valan per 72 uras per ils pendularis.
Lockdown per persunas betg vaccinadas
En l'Austria vala dapi glindesdi, ils 15 da november in lockdown per persunas betg vaccinadas. Quai ha la regenza decidì pervia dal dumber da record d'infecziuns novas da corona. Suenter ina seduta cun ils schefs da las singulas regiuns han ins decis limitaziuns da sortir che valan ina giada per 10 dis, pertutgadas èn radund dus milliuns persunas.
Quest pass na succedia betg cun cor lev, dentant saja el deplorablamain necessari, ha il chancelier Alexander Schallenberg manegià. Ed el ha menziunà la varianta Delta pli contagiusa e la quota da vaccinaziun en l'Austria che saja «turpegius bassa». Ils singuls pajais federativs da l'Austria possian introducir reglas anc pli severas.
Las excepziuns
Tgi che n'è betg vaccinà dastga be pli bandunar la chasa ord motivs urgents – sco cumpras per il basegn quotidian, il viadi a la lavur u la visita tar il medi. Betg pertutgads èn sper persunas vaccinadas er uffants sut 12 onns e persunas ch'èn guaridas ils davos 180 dis dal coronavirus.
