Regiun d'inundaziuns - André Gerth: «Tar nus n'hai dà nagin cumbat electoral»

André Gerth è fitg interessà en la politica tudestga. E per el èn las elecziuns 2021 ina premiera. Per l'emprima giada dastga l'um da 53 onns ir sez ad eleger. Per el èsi cler: I stoppia dar midadas en Germania. Cun la SPD e la CDU a la testa na crai el betg che quai capitia. L'um oriund da Mustér n'è betg uschè intgantà dad Olaf Scholz (SPD) ed Armin Laschet (CDU). La suletta speranza è per el la candidata dals Verds Annalena Baerbock.

Audiogalerie

André Gerth giavischass ina midada svelta ed effizienta en la politica dal clima. Tenor stan actual vul la Germania, per exempel extrar da l'energia da charvun (Braunkohle) enfin il 2038. Quai stoppia ir pli svelt, di l'ami da la natira.

Annalena Baerbock saja tranter ils trais candidats per il post da chancelier(a) la suletta persuna che saja autra. Ella saja pli giuvna, haja autras prioritads, autras ideas ed er in auter stil, uschia Gerth. Olaf Scholz ed Armin Laschet èn perencunter dus politichers rutinads e versads. Dus politichers che tschertgan dentant er gugent il cumpromiss e na vulan betg vilentar auters.

Sper ina politica per il clima metta l'um da 53 onns er grond pais sin in engaschi per plazzas da lavur sco er ina politica che gughegia d'ir novas vias. La Germania stoppia vegnir pli moderna ed innovativa sin il sectur da lavur. La finamira stoppia esser da vegnir in lieu da la scienzia e dal svilup digital. Munta era: Vegnir davent dal sectur d'industria e producziun. Cun la CDU e la SPD na crai il Rumantsch dentant betg ch'i dettia midadas.

Anc adina in lieu da catastrofa

Gea, las elecziuns stattan avant porta. Per blera glieud da la regiun dad Ahrweiler en il vest da la Germania nua ch'er André Gerth abitescha, è quai dentant be ina chaussa marginala en il mintgadi. Uschia na dettia er nagin cumbat electoral en la regiun. La catastrofa dal fenadur cun las auas grondas è anc adina fitg vesibla e preschenta. Ina normalitad saja lunsch davent, raquinta André Gerth. El e sia famiglia hajan gì cletg. Lur chasa na saja betg vegnida destruida durant las auas grondas. Els sappian viver pli u main normal. Per la gronda part da la citad da Bad Neuenahr-Ahrweiler èsi dentant anc ina lunga via enavos en in mintgadi normal. Dals 30'000 abitants n'han blers anc adina betg gas per stgaudar u aua currenta.

Bad Neuenahr-Ahrweiler (2 mais suenter)

N'er anc betg pussaivel èsi da far cumissiuns en la citad. Butias, mazlarias u pasternarias na dettia betg pli. La rait da telefon na funcziuna betg adina ed er la rait d'electricitad saja instabila. Quai èn tut puncts che fan unfis la populaziun, manegia l'um da 53 onns. Blers n'han er betg pli auto per ir a far cumissiuns en auters lieus. La glieud saja pli e pli fitg frustrada ch'i na giaja betg pli spert vinavant. I dettia adina dapli conflicts tranter la glieud. Uschia è la normalitad en la regiun Ahrweiler anc lunsch davent.