- La Conferenza dal clima da la ONU a Glasgow pretenda per l’emprima giada dals stadis dal mund da sortir da l’energia da charvun.
- La decleraziun finala che radund 200 pajais han approvà pretenda en pli er da stritgar subvenziuns ineffizientas per ieli, gas e charvun.
- Il text da la decleraziun è la finala però vegnì formulà pli moderà. La China e l’India han fatg squitsch.
Represchentantas e represchentants da bunamain 200 pajais èn sa cunvegnids ad ina decleraziun finala. Quella lascha sperar che la finamira da la Cunvegna da Paris – che prevesa in stgaudament global da maximal 1,5 grads – resta almain en vita. La finamira da l’inscunter è stà da reducir las emissiuns da gas cun effect da serra uschè fitg ch’igl è anc pussibel da cuntanscher questa finamira. Vegnissi pli chaud muntass quai, tenor bleras expertas ed experts, ch’il livel da la mar s’augmentass pli fitg e ch’i dess extrems d’aura cun dimensiuns catastrofalas.
Detagl en la formulaziun
La decleraziun finala è il resultat da contractivas ch’han cuzzà duas emnas. Atgnamain avess la conferenza cuzzà enfin venderdi. Sa cunvegnids èn ils pajais però pir la sonda.
Per l'emprima giada pretendan ils pajais dal mund da cumenzar cun la sortida da charvun. En l'ultima minuta èn las formulaziuns en la decleraziun vegnidas pli moderadas. La China sco er l’India han fatg squitsch. La finala ha l’India insistì da scriver «phase down» pia chalar cun l’energia da charvun, enstagl da «phase out» tge che munta sortir.
Avant l’ultima midada dal text ha il minister d’ambient e dal clima da l’India Bhupender Yadav anc crititgà la decleraziun.
Co po insatgi pretender, che pajais da svilup empermettan da betg pli subvenziunar charvun ed auters carburants fossils, sche quels pajais èn anc fatschentads cun il svilup per propi ed il cumbat da povradad?
Simonetta Sommaruga betg propi cuntenta
En consequenza è la ministra da l’ambient, Simonetta Sommaruga, detg trumpada dal resultat da la conferenza. I na saja betg gartegià da propi accelerar la reducziun da CO2, ha ditg Sommaruga envers SRF. Tuttina haja er dà intgins muments positivs: Er la Svizra stoppia metter il focus cumplainamain sin las energias regenerablas. Ella veglia uss s’engaschar ferm da sviluppar quellas en Svizra, uschia Sommaruga vinavant.
