Ils protests cunter la violenza da la polizia en ils Stadis Unids cuntinueschan. La raschun è il mazzament d'in American da pel stgira en connex cun in'acziun da polizia en la citad da Minneapolis en il stadi federativ da Minnesota.
Dasper Minneapolis èn persunas era idas sin via a New York, Los Angeles ed a Houston, sco quai che maletgs da televisiun mussan. Tar protests a Detroit è tenor la polizia morta ina persuna tras sajets.
In dals policists ch'è stà involvì a l'acziun mortala dispitaivla dal glindesdi a Minneapolis, è entant vegnì accusà. Ad el vegn renfatschà d'avair mazzà l'Afroamerican.
Stadi d'urgenza en pliras citads
Pervi dals protests cunter la violenza da la polizia e rassissem en ils Stadis Unids han suenter Minneapolis era Atlanta ed autras citads proclamà il stadi d’urgenza.
Var 500 commembers da la guardia naziunala dal stadi federativ da Georgia duain vegnir mobilisads per proteger persunas e proprietad. Quai ha communitgà il guvernatur dal stadi federativ. La presidenta da la citad dad Atlanta aveva dumandà per agid suenter ch’igl aveva dà cravals e sblundregiadas.
