Respostas dal manader da SRF digital Guido Berger sin las pli impurtantas dumondas:
- I n'è nagina attatga da cyber, il schef da la firma Crowdstrike, ch'è responsabla per la panna, ha sez ditg ch'i na saja betg stà in'attatga.
- Il sbagl è schabegià cun in update d'ina software da segirtad. Il sbagl è stà uschè gravant ch'el ha chaschunà in blackout da l'entir computer tar las interpresas e societads pertutgadas. Entant ha Crowdstrike mess a disposiziun in update che duai curreger il sbagl.
- La software da Crowdstrike è necessaria per proteger computers colliads cun la rait, per exempel sistems da check-in. Perquai na datti nagin'alternativa che duvrar quests sistems da segirtad per proteger ils sistems d'attatgas da cyber, e quels na pon betg vegnids laschads davent.
Update 15:00
Ils problems tecnics ch'il update da Crowdstrike ha chaschunà na sajan betg il resultat d'ina attatga da cyber sin l'interpresa, ha ditg il CEO George Kurtz sin X. In sbagl en in singul update per computers cun Windows saja il motiv per la panna. Computers cun in sistem da Mac u Linux na sajan betg pertutgads.
Update 13:00
- Sper l'eroport da Turitg han er ils Stadis Unids problems cun las societads aviaticas.
- Pertutgads èn però era bancas, ospitals, tancadis ed emetturs da televisiun.
- Tenor l'Uffizi federal per cyber-segirezza na sa tractia betg d'in'attatga da cyber – mabain d'in update problematic da products da la firma Crowdstrike – ina firma gronda per segirezza en l'informatica. E sco quai che Crowdstrike communitgescha, saja il problem cun l'update problematic entant schlià.
Update 11:00
- Pliras societads aviaticas ed eroports annunzian problems. L'eroport a Turitg ha stritgà las terradas – mo eroplans ch'èn gia da viadi en direcziun Turitg dastgan anc sa tschentar. Era Ryanair ha problems e cusseglia als passagiers da vegnir almain 3 uras avant il sgol a l'eroport. Nagins problems n'haja l'eroport da Frankfurt.
- L'emettur da televisiun englais «Sky News» n'emetta nagin program il mument.
- En Germania èn era ospitals pertutgads. L'ospital universitar da Kiel e Lübeck ha annunzià da stritgar tut las operaziun betg exnum necessarias, plinavant sajan las staziuns ambulantas vegnidas serradas.
- Nagins problems annunzia la bursa svizra SIX. Sco in pledader ha ditg envers l'agentura AWP na dovria SIX betg products da Crowdstrike.
Sbagl tar in program da segirezza
Sco diversas medias rapportan supponan ins il motiv per il problem tar in update d'in program da la firma da segirtad Crowdstrike. In'interpresa d'energia en l'Australia ha inditgà quest update sco motiv per il problem. L'interpresa Crowdstrike ha annunzià problems en in mail a clients.
Il problem tar Crowdstrike haja era chaschunà problems tar programs da Microsoft, sco per exempel cun il servetsch online 365.
Sin l'entir mund han societads aviaticas, medias ed interpresas da telecommunicaziun incaps en lur sistems d'IT. En ils Stadis Unids han pliras societads aviaticas stuì arretar lur sgols. Er en l'Australia, l'Engalterra e l'India vegnan rapportà grevs problems tecnics. La situaziun dal traffic aviatic internaziunal è sa normalisada pir en il decurs da la sonda. A l'eroport da Turitg era la situaziun sa normalisada gia il venderdi suentermezdi. Lez era stà pertutgà mo indirectamain, sco quai ch'ina pledadra da medias ha ditg envers SRF. Per part avevian ins stuì far il check-in a maun ed i haja dà blers retards.
En l'exteriur èn bancas, tancadis, dentant er emetturs da televisiun stads pertutgads e na pudevan betg u mo parzialmain porscher lur servetschs. Er a Berlin e a Amsterdam hai era dà problems. Als eroports d'omaduas citads han sgols stuì vegnir stritgads. Tenor il radio Berlin-Brandenburg saja in server crudà ora, e plirs sistems d'urgenza hajan surpiglià la lavur.