A la conferenza da clima da l'ONU ha ses president da quai onn, Sultan Al-Jaber, procurà per irritaziuns.
En ina conferenza da video da l'ONU ha el pretendì il november, ch'i na dettia «ina scienza» che di ch'ins stoppia desister d'energias fossilas, per restrenscher la stgaudada globala sin 1.5 grads. Quai rapporta la gasetta «The Guardian».
Plinavant ha el ditg en quella conferenza, che svilup na saja betg pussaivel senza nizzegiar energias fossilas, «sch'ins na vul betg ir enavos en il temp da crap».
Sco president da la conferenza maina Al-Jaber la conferenza globala dal clima COP28 a Dubai, ch'ha cumenzà la gievgia passada. Al-Jaber è dentant er il CEO dal concern statal d'ieli dals Emirats Arabs Unids.
Sin dumonda da la DPA ha in pledader da la COP28 ditg, che «questa istorgia è in'ulteriura emprova da sabotar l'agenda da quest presidi». Il president Al-Jaber sappia, che la sortida en etappas da las energias fossilas è inevitabla.
En ina emprima reacziun sin il rapport dal «Guardian» dal presidi hai anc gì num, Al-Jaber haja sa basà qua sin in rapport dal cussegl dal clima mundial, che supponia ch'energias fossilas vegnian er en il futur a giugar ina rolla, dentant ina pli pitschna.
En las negoziaziuns a Dubai sa mussia, tenor indicaziuns d'activists ed activistas, che l'Arabia Saudita, la Russia e l'Irac sa mettan encunter ina sortida d'energias regenerablas. Quels pajais hajan exprimì avertamain lur opposiziun.
