Las religiuns dal mund duain ir ordavant. Ellas duain mussar, ch'ina midada è pussaivla, e dar perditga d'in stil da vita persistent e plain respect. Quai ha Papa Francestg ditg a chaschun da sia preschientscha a la COP28, ch'ha cumenzà la gievgia passada a Dubai.
A la conferenza globala dal clima negozieschan ils stadis dal mund davart mesiras cunter la midada dal clima. Er las religiuns han avant lieu in pavigliun.
Las religiuns duain collavurar, e quai betg per ils agens interess u ils interess d'ina partida, mabain per ils interess da l'entir mund, ha Papa Francestg ditg en in messadi da video.
Nus stuain midar noss stil da viver ed educar ad in stil da vita simpel e fratern. Quai è in agir, ch'è indispensabel per religiuns che vulan manar envers la contemplaziun.
Las religiuns na duain dentant betg passar en la «trapla dal sincretissem».
Cun ses messadi ha il Papa er fatg in appel a la pasch. «Igl è evident, che guerras e conflicts donnegian l'ambient e partan las naziuns e impedeschan uschia finamiras communablas, sco la protecziun dal planet.»
Il Papa sez ha stuì dir giu sia participaziun a la conferenza pervia da problems da sanadad.
