Pervi da plievgia da monsun ordvart ferma dapi il zercladur cumbatta la populaziun dal Pakistan cunter extremas inundaziuns. Tenor la ministra da midament dal clima, Sherry Rehman, saja in terz dal pajais sut aua. Ella descriva la situaziun sco «ina crisa da proporziuns inimaginablas».
Tenor las autoritads localas èn 33 milliuns persunas pertutgadas. Gia passa 1'100 persunas sajan mortas pervi da las inundaziuns desastrusas. Passa in milliun chasas sajan vegnidas donnegiadas, 3'500 kilometers vias devastadas ed enturn 160 punts sajan crudadas ensemen. Il ministeri da planisaziun quinta cun donns d'enturn 10 milliardas dollars per l'economia pakistana.
La Svizra vul gidar
L'ONU ha oz fatg in appel per rimnar 160 milliuns dollars per agid d'urgenza pel pajais asiatic. La Svizra vul gidar cun otg milliuns francs. Tschintg da quels duain ir al fond per agid d'urgenza da l'ONU e trais a la crusch e la mezzaglina cotschna. Sin Twitter scriva il president federal Ignazio Cassis che ses pensaments sajan cun las milliuns persunas pertutgadas da las inundaziuns.
El annunzia vinavant che la Svizra veglia trametter experts ed expertas d'agid umanitar en Pakistan.
