La Svizra dovra mintg'onn ina milliun tonnas plastic – per persuna èn quai 125 kilograms. Particlas da quest plastic pon ins schizunt chattar en la naiv. Bler sa tschenta era en la mar. Maletgs da tartarugas ch'èn pigliadas en raits da pestga u fotos da peschs morts che han mangià plastic – quai enconuschain nus tuts. Differentas interpresas produceschan vestgadira u accessoires ord plastic reciclà. Blers da quels han lura si il signet «Ocean Plastic». Ma auter che quai ch'ins smina, deriva il plastic duvrà darar direct ord la mar.
Na betg mo plastic ord la mar
Il problem è ch’i na dat nagina definiziun correcta per «Ocean Plastic». Perquai dovran interpresas era quest slogan per megliurar l'agen image. «Ocean Plastic» sa bain esser material sintetic che sa chatta lunsch ora en la mar, ma ì po era esser material ch'è vegnì rimnà a la riva u schizunt enfin 50 kilometers davent da quella.
Meglier che plastic nov
Paucas interpresas dovran propi plastic ch'els rimnan directamain ord la mar. Quest plastic è savens tschuf e cuntegn restanzas da conchiglias. Rimnar, schubregiar e sortir el dovra grond engaschament ed è collià cun auts custs. Tuttina èsi meglier da cumprar products ord plastic reciclà ch'ord plastic nov. Plinavant pon ins uschia era procurar ch'il plastic rimnà a la riva na cuntanscha betg la mar.
Ils problems restan
Tuttina na schlian ils products dad «Ocean Plastic» betg il problem dal plastic en la mar. Quai damai che quels products na cuntegnan savens betg mo plastic reciclà, mabain era plastic nov. E sch'ins lava per exempel in tricot che cuntegn plastic – saja quai plastic nov u reciclà – sa schlian pitschnas particlas che cuntanschan lura forsa puspè la mar entras aua persa.
