Ils 30 stadis commembers da la NATO han suttascrit ils protocols d'entrada per la Finlanda e la Svezia. Il secretari general da l'organisaziun Jens Stoltenberg ha discurrì d'in «mument istoric». Avant che la Finlanda e la Svezia èn commembras definitivas da la NATO, ston ils parlaments dals stadis commembers actuals anc approvar quest pass.
Tirchia ha pliras emnas bloccà ils discurs d'adesiun
La Finlanda e la Svezia avevan il matg tschentà uffizialmain la dumonda per daventar commembers. Atgnamain fissi stà planisà ch'il cussegl da la NATO decidia immediat da laschar ir liber ils discurs d'adesiun. La Tirchia haja però fatg cler en la sesida ch'ella haja resalvas da segirezza e ch'ella na possia il mument betg approvar las dumondas.
Pir suenter che la Finlanda e la Svezia han las emnas passadas empermess en ina decleraziun a scrit ch'els èn d'accord cun pliras pretensiuns da la Tirchia, haja lezza lura dà suenter.
Ils pajais nordics han gia suttascrit il matg
Il minister da l'exteriur da la Finlanda, Pekka Haavisto, aveva gia suttascrit il matg la dumonda d'adesiun a la NATO. Quai suenter ch'il parlament finlandais ha dà glisch verda suenter ina debatta da dus dis davart questa dumonda.
Cun quella ha era la Finlanda reagì sin la situaziun da segirezza ch’è sa midada tras l'offensiva russa en l’Ucraina. Perquai vuleva er la vischina, la Svezia, daventar commembra da l'allianza militara. La ministra Ann Linde haja ura era suttacrit la dumonda.