Sin il mund datti adina dapli emissiuns da CO2. L'onn passà ha la concentraziun dal gas da serra cuntanschì ina nova marca. I dat 50% dapli CO2 en l'atmosfera, cumpareglià cun avant l'industrialisaziun. Quai scriva l'organisaziun mundiala per l'aura.
«Malgrà avertiments da la communitad scientifica sur onns, millis da rapports e tozzels da conferenzas da clima main nus en la fallada direcziun», di il schef da l'organisaziun. L'umanitad saja sin via da surpassar per lunsch las finamiras da la cunvegna da Paris da restrenscher il stgaudament global sin 1,5, sin il pli dus grads.
La concentraziun da CO2 è stada il 2022 uschè auta sco per la davosa giada avant 3 fin 5 milliuns onns. Lura eran las temperaturas fin 3 grads pli autas sin terra. Il livel da la mar era fin 20 meters pli aut. Er auters gas da serra sco metan han cuntanschì concentraziuns da record en l'atmosfera.
Cunquai ch'il CO2 restia fitg ditg en l'aria vegnian las temperaturas a s'augmentar era ils proxims decennis, era sch'ins vegniss da reducir svelt las emissiuns sin nulla.
Ils 24 fin ils 28 da november s'inscuntran las regenzas dal mund a Dubai per discutar mesiras cunter la stgaudada globala.
