Tar l'attatga sin in ospital d'uffants en la citad Mariupol sajan trais persunas mortas, di il vicepresident da Mariupol, Sergej Orlow, a l'emettur britannic BBC. Avant avevan las autoritads ucranaisas rapportà da 17 persunas blessadas.
L'Ucraina fa responsabla la Russia per questas attatgas. Entant ha il minister per l'exteriur russ Sergej Lawrow però refusà talas reproschas sco infurmaziun fallada. Tenor il delegà suppleant da la Russia tar las Naziuns unidas Dmitri Poljanskii saja quai pli baud stà ina clinica. Entant haja però il militar surpiglià questa. Cumbattants ucranais hajan sajettà ord questa clinica.
La mesemna aveva la Svizra condemnà l'attatga supponida sin l'ospital d'uffants a Mariupol sco «act inuman nunchapibel». L'ospital attatgà saja en il passà era vegnì sustegnì cun agid umanitar da la Svizra. La Svizra saja consternada dal bumbardament, ha communitgà il departament federal per fatgs da l'exteriur.
La Svizra appelleschia a la Russia da respectar las obligaziuns dal dretg internaziunal e da chalar immediat da sajettar sin instituziuns civilas.
