Passa 100 schefs da stadi e da regenza a la conferenza mundiala davart il clima a Glasgow veglian la destrucziuns dals guauds duai vegnir franada – sco il pajais ospitant, la Gronda Britannia, ha communitgà.
85 pertschient da la surfatscha globala dals guauds èn sin intschess da quests pajais che vulan far frunt a la destrucziun dals guauds, tranter auter l’entira Uniun europeica, il Canada, la Russia, la Brasilia, l’Indonesia ed er la Svizra. Per cuntanscher questa finamira, duajan fin l'onn 2025 vegni duvrads varga 19 milliardas dollars – quai dal maun public, mo er d’investiziuns privatas. Ordavant ha il president da la Confederaziun admonì che las stentas actualas per ademplir las finamiras da la Cunvegna da Paris na tanschian betg. El ha pretendì da tuttas terras dal mund finamiras pli ambiziusas en connex cun il clima.
Duas emnas deditgadas al clima
La conferenza, era numnada COP26, vegn a cuzzar duas emnas. Represchentants e represchentantas da 197 stadis, tranter els era il president american Joe Biden e la chanceliera tudestga Angela Merkel, vegnan a discutar davart l'urgenza da success en il cumbat cunter la midada dal clima. Las consequenzas da l'augment da la temperatura valan malgrà l'augment da sitgiras, inundaziuns e stemprads gist anc sco dumagnabel.
Finamiras
Tar la cunvegna a Paris, l'onn 2015, èsi vegnì decidì ch'ils pajas lessian uss far tut per limitar il stgaudament dal mund sin 1,5 grads. Ussa, sis onns pli tard, stoi vegnir mussà a Glasgow sch'ils pajas èn sin buna via u betg. Tenor la cunvegna da Paris, avessan ils pajais gì da trametter lur plans e mesiras per proteger il clima avant l'inscunter a Glasgow. Singuls pajais han tramess lur concepts, blers dentant betg.
Ussa è la finamira da stabilisar il stgaudament dal mund sin sut 2 grads. Enfin cura che quai duai capitar e co exact ch'ins vul realisar quai, vegn decidì durant l'inscunter.
Las mesiras concretas mancan
Enfin il 2035 stuessan las emissiun da gas vegnir reducidas per la mesadad e 20 onns pli tard n'astgassi dar insumma naginas emissiuns da gas nuschaivels pli. Dentant n'è negin pajais sin quest curs, n'era la Svizra betg. La midada davent d'energia fossila, sco charvun, gas u ieli, sin energias regenerablas sco forza idraulica u forza dal vent, na va betg uschè svelt sco giavischà. Glasgow duai uss purtar nov schlantsch per midadas.