Dapi 12 onns viva Neisa Bass, oriunda da Zernez, a Miami en il stadi da Florida. Ch'il hurican «Milton» ha chaschunà gronds donns ed inundaziuns, hajan ins strusch percurschì a Miami, ch'è circa 450 kilometers davent dal lieu, nua ch'il hurican è fruntà sin terra.
Tema n'avain nus gì nagina, perquai ch'ins vegn adina infurmà fitg bain.
La populaziun vegnia infurmada tras medias socialas, la televisiun ed apps, nua ch'il hurican vegnia a traversar. Grondas preparativas n'ha Neisa Bass betg fatg – ella haja mo retratg avunda daners contants, perquai che cartas da credit na funcziunan betg sche l'electricitad croda or. Vinavant haja ella chargià il telefonin ed emplenì il tanc da benzin da l'auto.
Sia parantella, che viva per part pli datiers da la zona da privel dal hurican «Milton», saja era vegnida preservada da gronds donns – per part n'hajan els nagina forza electrica ed empau aua en tschaler, uschiglio giaja quai bain cun els.
Ciclon, hurican u taifun?
Stemprads tropics han differents nums, dependent danunder ch'els vegnan. Per tuts dovri dentant las medemas premissas:
- Temperatura d'aua >26℃
- blera umiditad en l'aria
- atmosfera instabila
- pauca stuschada da vent («Windscherung»)
- almain 5° davent da l'equator per che la forza da coriolis è ferma avunda
La fermezza da huricans vegnan mesirada sin la scala da Saffir-Simpson.
