Quel valia per 3 mais, ha annunzià il president Recep Tayyip Erdogan suenter ina sesida extraordinaria dal cussegl da segirezza naziunal e dal cabinet. Sut il stadi d'urgenza po Erdoan reger per decret. Vul dir: ils dretgs fundamentals sco la libertad da pressa u da reuniun pon vegnir abolids u restrenschids.
L'emprova da putsch n'è forsa anc betg a fin.
Il stadi d'urgenza saja necessari per pudair «eliminar tant pli spert tut ils elements» che sajan involvids en l'emprova da putsch, ha argumentà Erdogan. Il president ha punctuà che l'emprova da putsch na saja forsa anc betg a fin. I pudessia dar ulteriurs plans. Detagls n'ha Erdogan però betg numnà.
Suenter l'emprova da putsch dal militar la notg sin sona eran gia pliras milli persunas vegnidas arrestadas en Tirchia. Plinavant eran vegnids relaschads u suspendids radund 50'000 collavuraturs dal servetsch public, tranter quels er derschaders e procuraturs publics e passa 15'000 magisters. Erdogan ha plinavant avert ina debatta davart reintroducir la paina da mort.
RR novitads 23:00