La regenza tirca ha ordinà d'arrestar radund 140 derschaders e procuraturs publics.
Tenor meds da massa tircs reproscha la regenza als derschaders ed als procuraturs publics d'esser commembers d'in'organisaziun terroristica e d'esser sa participà a l'emprova da derscher la regenza. Gia sonda eran vegnids arrestads bunamain 20 commembers da la dretgira constituziunala, dal cussegl statal e dal cussegl dals derscaders e procuraturs publics. En tut èn gia 2'700 derschaders vegnids relaschads – suenter l'emprova da derscher la regenza.
Nagin 'schec en blanco' Erdogan
La regenza franzosa avertescha il president tirc d'in agir memia sever suenter l'emprova da putsch malgartegiada. Per l'acziun da schubregiada da la regenza tar l'armada na dettia quai nagin schec en blanco, ha ditg il minister da l'exteriur franzos, Jean-Marc Ayrault.
Er il minister da l'exteriur austriac, Sebastian Kurz, ha pretendì che l'Europa mussia ils cunfins ad Erdogan. Il president tirc stoppia sa tegnair vid ils dretgs fundamentals.
Emprova da putsch turmenta las relaziuns cun ils Stadis Unids
L'emprova da derscher la regenza tirca turmenta las relaziuns tranter ils Stadis Unids da l'America e la Tirchia. Il minister da l'exteriur american John Kerry refusa la reproscha ch'ils Stadis Unids sajan stads involvids en l'acziun. La regenza tirca inculpescha il predicatur tirc Fethullah Gülen che viva en ils Stadis Unids d'esser responsabel per l'emprova da derscher la regenza tirca. Il president tirc Recep Tayyip Erdogan pretenda ch'ils Stadis Unids extradeschian u arresteschian Gülen.
Festas en differentas citads
En differentas citads tircas han entant pliras 10 milli persunas festivà la victoria dal president Recep Tayyip Erdogan. Meds da massa rapportan da persunas giubilantas cun bandieras tircas dal vest fin en l'ost dal pajais.
Avant il consulat general tirc a Turitg han ier saira demonstrà pliras tschient persunas. Ellas sajan s'inscuntradas per mussar lur solidaritad cun il president tirc Recep Tayyip Erdogan. Quai suenter l'emprova dal militar tirc da derscher el, uschia la polizia turitgaisa. La demonstraziun saja stada paschaivla. Clamà a la demonstraziun spontana era tranter auter vegnì sin la rait sociala Facebook.
Swiss sgola puspè ad Istanbul
La societad aviatica Swiss sgola puspè en la citad tirca d'Istanbul.
Suenter l'emprova dal militar da derscher la regenza tirca la notg sin ier – sgolian ils aviuns puspè tenor plan davent dad oz – uschia la societad aviatica.
Tgi che veglia entant cudischar enturn ses sgol – possia far quai gratuit.
La Swiss aveva stritgà ier tut ses sgols ad Istanbul.
Tge ch'è enconuschent:
- Il putsch è stinschentà
- La regenza ha relaschà passa 2'700 derschaders e suspendì 5 commembers dal cussegl aut dals derschaders ed advocats. 140 derschaders duain vegnir arrestads.
- Passa 6'000 persunas / putschists supponids èn vegnids arrestadas
- En la notg sin sonda èn almain 265 persunas mortas
- Varga 1'000 persunas blessadas
- I ha dà explosiuns tant ad Ankara sco ad Istanbul
- las regiuns da turissem betg pertutgadas
- Il president tirc fa responsabel ses inimì Fethullah Gülen
Novitads 06:00